सत्तागठबन्धन परिवर्तन पछि देउवाले भने ‘प्रचण्डले कुनै पनि दिन धोका दिन्थे’

इच्छाकामना न्युज

२१, फाल्गुण २०८०

सत्तागठबन्धन परिवर्तन पछि देउवाले भने ‘प्रचण्डले कुनै पनि दिन धोका दिन्थे’

काठमाण्डौ । नेपाली कांग्रेसका सभापति शेरबहादुर देउवाले प्रधानमन्त्री पुष्पकमल दाहाल ‘प्रचण्ड’ धोकेबाज भएको निष्कर्ष पदाधिकारी बैठकमा सुनाएका छन् । प्रधानमन्त्रीलाई काम गर्न अनुकूल पार्न आफूले हर प्रयत्न गरे पनि उनले भने धोका दिएर गठबन्धन तोडेको देउवाको भनाइ थियो ।

पदाधिकारी र पूर्वपदाधिकारीको बैठकमा देउवाले प्रचण्डले धोका दिन्छन् भनेर आफू सतर्क रहे पनि उनले आफ्नो अश्लियत नत्यागेको बताएका थिए । एक पदाधिकारीका अनुसार देउवाले बैठकमा यस्तो ब्रिफिङ गरेका थिए ।

“मैले गठबन्धनमा आशंका नबढोस् भनेर केपी ओलीको फोन आउँदा समेत टार्ने काम गरे,” देउवाले बैठकमा भनेका थिए, “तर, उनले धोका दिएर गठबन्धन तोडे । गठबन्धन तोड्नु कांग्रेसलाई मात्र होइन जनतालाई समेत धोका दिएको हो ।”

प्रचण्डले अर्थमन्त्री फेर्न प्रस्ताव गरेपछि देउवाले अर्थमन्त्रीमार्फत के काम गर्नुपर्‍यो म सहजीकरण गर्छु भनेर समेत प्रधानमन्त्रीसँग भेटमा भनेको उल्लेख गरेका थिए । उनले कुनै मन्त्रीलाई अभियोग लाग्यो भनेर हटाउने कुरा उपयुक्त नभएको भन्दै त्यसको पुष्टि भएपछि हटाउन आफूले सल्लाह दिएको बताएका थिए । तर, प्रधानमन्त्री सरकार सञ्चालनको सहजता नभएर अर्कै कुराबाट प्रभावित भएको बताएका थिए । उनले त्यो अर्कै कुरा के थियो भन्ने प्रष्ट पारेका छैनन् ।

“उनको नियत नै ठिक थिएन र उनी गठबन्धन फेर्ने निर्णयमा पुगेका हुन्,” देउवाले बैठकमा भनेका थिए, “मन्त्री फेर्ने बहाना मात्र हो ।”