एमालेको संकल्प यात्रा आज पाँचथर पुग्दै

इच्छाकामना न्युज

३०, मंसिर २०८०

काठमाडौं । नेकपा (एमाले)को पुष्पलाल (मध्यपहाडी) राजमार्ग केन्द्रित ‘झुलाघाट–चिवाभञ्ज्याङ समृद्धिका लागि संकल्प यात्रा’को अन्तिम जिल्ला पाँचथर पुग्दैछ ।

एमालेका प्रचार तथा प्रकाशन विभागका प्रमुख राजेन्द्र गौतमका अनुसार अब दुईदिनमा मध्यपहाडी राजमार्गको यात्रा टुंगिदैछ ।

शुक्रबार गएराती यात्रा टोली अध्यक्ष केपी शर्मा ओलीको जन्मथलो तेह्रथुमको आठराईमा बास बसेको छ । आज बिहान यहाँबाट ७६ किलोमिटर दुरी पार गरेर पाँचथरतर्फ यात्रा टोली अघि बढ्ने गौतमले जानकारी दिए ।

आज पाँचथरमा आमसभाको आयोजना गरिएको छ । एमालेले यात्राका क्रममा मध्यपहाडका विविध समस्या पहिचान गरी लाखौं जनतासँग साक्षात्कार गरेको छ ।

मध्यपहाडको आर्थिक, सामाजिक, सांस्कृतिक, धार्मिक अवस्था तथा उद्योग, पर्यटन लगायतको सम्भावना बुझ्न एमाले अध्यक्ष ओलीको नेतृत्वमा वरिष्ठ उपाध्यक्ष ईश्वर पोखरेल, उपाध्यक्षहरू, महासचिव शंकर पोखरेल, उपमहासचिवहरू, सचिवहरू, स्थायी कमिटी, पोलिटब्युरो, केन्द्रीय कमिटी सदस्यहरू, प्रदेश कमिटी लगायतका नेताहरू, प्राविधिक, विज्ञ सम्मिलित टोलीसहित समृद्धिको लागि संकल्प यात्रामा छन् ।

बैतडीको झुलाघाटबाट मंसिर १४ गतेदेखि सुरु भएको यात्रा पुस १ गते पाँचथरको चिवाभञ्ज्याङ पुग्ने कार्यक्रम रहेको छ ।