भरतपुर । सडक डिभिजन कार्यालय भरतपुरले नारायणगढ–मुग्लिन सडकखण्डमा पहिराको जोखिमलाई मध्यनजर गर्दै यन्त्र उपकरणसहितको जनशक्ति तयारी अवस्थामा राखेको छ । जुगेडी कटेपछि मुग्लिनसम्मको सडकमा तीन ठाउँमा पहिरो हटाउने मेसिन र इन्जिनियरसहितका कर्मचारी तयारी अवस्थामा राखेको कार्यालयले जनाएको छ ।

कार्यालयका सूचना अधिकारी इन्जिनियर चण्डेश्वर साहका अनुसार जोखिमयुक्त ठाउँका लागि पायक पर्ने तीन ठाउँमा मेसिन राखिएको छ । ‘दुईवटा लोडर र एउटा एक्साभेटर चौबिसै घन्टा तयारी अवस्थामा राखेका छौँ’, उनले भने, ‘पुल निर्माणको काम पनि भइरहेको हुँदा आवश्यक पर्दा निर्माण कम्पनीको यन्त्र उपकरण पनि प्रयोगमा आइरहेको छ ।’ त्यसबाहेक आवश्यक पर्दा थप गरेर काम गर्दै आएको उनले बताए ।

‘सडक अवरूद्ध भएमा खुलाउनका लागि दुई जना सुपरभाइजर, एक जना इन्जिनियर, दुई जना सव–इन्जिनियर र १२ जना वर्कर हुन्छन्’, उनले भने । बाटो खुलाउनका लागि जिल्ला प्रशासन, जिल्ला प्रहरी, जिल्ला ट्राफिकलगायतका निकायसँग समन्वय गरेर काम गरिरहेको उनले बताए । सडक निर्माण सम्पन्न भइसकेपछि पहिराको जोखिम भएका ३३ स्थानको पहिचान गरी पहिरो रोक्ने जाली लगाउने काम पनि भएको थियो । पहिल्यै जाली लगाएको ठाउँमा पहिरो नझरेको उनले बताए ।

तर, पुल बनाउने ठाउँमा त्यही जालीको आवश्यकता परेको उनले बताए । ‘अहिले सडकको छेउतर्फको भागमा नयाँ पुल बनाएको ठाउँ सुरक्षित भए पनि कुना (भित्तो)तर्फको भागमा नयाँ पुल बनाएका स्थानमा जोखिम बढेको देखिन्छ’, उनले भने, ‘त्यस्ता स्थानमा फेरि जाली लगाउनुपर्ने देखिएको छ ।’

देशको राजधानीसँग जोड्ने मुख्य बाटो भएकोले पनि यो बाटोलाई ‘जीवनरेखा’ अर्थात् लाइफलाइनको उपमा दिँदै आइएको छ । तर, पहिराको जोखिम सधैँ भइरहने हुँदा बेला–बेला यात्रुले नराम्रैसँग कष्ट व्यहोर्नु परेको छ । त्यसैले यसको विकल्पमा नयाँ बाटोको खोजी हुनु आवश्यक देखिन्छ ।

भण्डारा–मलेखु जोड्ने चेपाङमार्ग र शक्तिखोरबाट फिस्लिङ जोड्ने बाटोको ट्रयाक खुलेको छ । तर, ती बाटा हाललाई नारायणगढ–मुग्लिनको वैकल्पिक मार्ग हुन नसक्ने कार्यालयका सूचना अधिकारी इन्जिनियर साहले बताए । भण्डाराबाट मलेखु जाने बाटोको ट्रयाक पूर्णरुपमा खुलिनसकेकोले मुग्लिन–नारायणगढ सडकको विकल्प हुन सक्ने अवस्था नरहेको उनले बताए ।

शक्तिखोरबाट फिस्लिङ जोड्ने बाटो पनि साना गाडीहरु चल्न सक्ने भए पनि मुग्लिन–नारायणगढ सडकमा चल्ने सवारीसाधनका लागि उपयुक्त बाटो नभएको उनले बताए । ‘त्यसैले साना सवारीसाधनका लागि सोच्न सके पनि ठूला सवारीसाधनका लागि नारायणगढ–मुग्लिन सडकको वैकल्पिक मार्ग भनेको हाललाई नयाँ ट्रयाककै खोजी हो’, उनले भने ।

बेला–बेलामा पहिरो झरिरहने हुँदा सडक डिभिजन कार्यालय र जिल्ला प्रहरी कार्यालय चितवनले नारायणगढ–मुग्लिनको बाटो हिँड्दा मौसमको अवस्था हेरेरमात्रै हिँड्न आग्रह गर्दै आएको छ । चितवनपोष्टबाट