काठमाडौँ । नेपाली चलचित्र ‘प्रेमा’लाई हिन्दी, तामिल र तेलुगु भाषामा समेत प्रदर्शन गरिने भएको छ। काठमाडौँमा आयोजित पत्रकार सम्मेलनमा निर्देशक गोविन्दसिंह भण्डारीले नेपालीबाहेक अन्य भाषालाई ‘ओभर दी टप’ अर्थात् ओटिटीका माध्यमले दर्शकमाझ पु¥याइने जानकारी दिए। ‘मैले तेलुगु चलचित्रमा पनि काम गरेको छु। त्यहाँका दर्शकलाई लक्षित गर्दै स्वराङ्कन गरिएको छ। यद्यपि नेपालमा भने नेपाली भाषामा मात्र प्रदर्शन हुनेछ’, निर्देशक भण्डारीले भने, ‘हामीले अन्य दर्शक थप्ने हो भने स्वराङ्कनको विकल्प नै छैन। यसले ओटिटीमा स्थान पाएमा अन्य चलचित्रलाई समेत सजिलो हुनेछ।’ 

‘रणवीर’ चलचित्रमार्फत निर्देशनमा प्रवेश गरेका भण्डारीले चलचित्र द्वन्द्वप्रधान र प्रेमकथामा आधारित रहेको बताए। ‘दर्शकलाई फरक स्वाद दिउँ भनेर प्रेम कथानक विधा रोजेको हुँ। यसमा द्वन्द्व छ, तर प्रेमको,’ उनले भने, ‘यसपछि केही समय म यस्तो चलचित्र निर्देशन गर्दिनँ।’ 

कात्तिकमा प्रदर्शन भएको चलचित्र ‘महापुरूष’मार्फत दर्शकमाझ स्थापित भएका अभिनेता अरुण क्षेत्री पनि चलचित्रमा मुख्य भूमिकामा देखिएका छन्। उनले कथावस्तु सुन्दर रहेकोले चलचित्रमा काम गरेको बताए। ‘ट्रेलरमा उस्तै देखिए पनि मेरो चरित्र विल्कुलै फरक छ,’ उनले भने, ‘सकेसम्म आफूलाई भिन्न देखाउने कोसिस गरेको छु।’ 

चलचित्रकी अभिनेत्री सुभेक्षा खड्काले आफूले निर्वाह गर्न चाहेको भूमिका पाएको जानकारी दिइन्। ‘यो चरित्रसँग भावनात्मकरूपमा समेत जोडिएकी थिएँ। यसलाई जीवन्त बनाउन आफ्नोतर्फबाट सक्दो मेहनत गरेकी छु,’ उनले भनिन्। पत्रकार सम्मेलनमा एसडी योगीको स्वर, सविन एकतारेको शब्द र सुशान्त गौतमको सङ्गीत रहेको चलचित्रको नयाँ गीत ‘फूल यो चुँडेर’समेत सार्वजनिक गरिएको थियो। 

त्रिकोणात्मक सम्बन्धलाई चित्रण गरिएको चलचित्रलाई काठमाडौँ, धनगढी र कर्णालीमा छायाङ्कन गरिएको छ। चलचित्रमा विमला केसी, हिउँवाला गौतम, पुरण जोशी, सविन बास्तोला, रोशनी स्याङ्बो, प्रकाश बस्नेत, महान थापा, सुरेन्द्र बसेल, भिभियाना थपलियालगायतले अभिनय गरेका छन्। चैत १७ गतेदेखि प्रदर्शन हुने चलचित्र ‘प्रेमा’लाई उपत्यकामा जिजीए ग्रुप र मोफसलमा एफडी कम्पनीले वितरण गर्दैछ।