चितवन । चितवनको नरायणगढमा मुख्य कार्यालय रहेको सेन्ट्रल कलेजले प्रणय दिवसको अवसर पारेर ‘प्रेमको आयाम’ विषयमा छलफल गरेको छ । सोच परिवर्तन नेपाल, सरल नेपाललगायतका संस्थाहरुसँगको सहकार्यमा कलेजले शनिबार छलफल कार्यक्रम सञ्चालन गरेको हो । कार्यक्रममा सहभागीहरुले प्रेमको परिभाषा दिँदै प्रेम जुनसुकै समयमा जोकोहीसँग पनि हुनसक्ने बताए । सो कार्यक्रममा ‘मोटिभेसनल वक्ता’ इश्वर गैरेले प्रेमको विभिन्न ६ वटा आयामहरु हुने उल्लेख गर्नुभयो । कसैले पनि निःस्वार्थ भावले प्रेम नगर्ने भन्दै गैरेले व्यक्तिले कुनै न कुनै स्वार्थ राखेर प्रेम गर्ने बताउनुभयो ।

अधिकांश युवाहरु विपरित लिङ्गी प्रतिको आकर्षणमा प्रेममा पर्ने गरेका उल्लेख गर्दै त्यो मात्रै प्रेम नभएको गैरेको भनाइ छ । गैरेले युवायुवतीबीचको प्रेम सम्बन्ध विछोडिनुमा अर्को व्यक्तिको हात हुने भन्दै विछोड हुँदा दुःख मनाउन गर्नु व्यर्थ भएको बताउनुभयो । एउटा सम्बन्ध तोडिएको अवस्थामा अर्को नयाँ सम्बन्धको विकास हुने गैरेले बताउनुभयो ।

कार्यक्रममा युवा अभियान्ता अर्जुन भुसालले प्रेममा जात, उमेर, धर्म, पेसा, हैसियत केही पनि नहेरिने बताउनुभयो । युवायुवतीबीच हुने प्रेममा एकअर्काले सबै कुरा प्रष्ट भन्नुपर्ने भन्दै झुटको आधारमा बनेको सम्बन्ध टिकाउन नहुने प्रष्ट पार्नुभयो । सबै उमेर समूहका व्यक्तिमा प्रेम हुने भएपनि कोशोरावस्थापछिको प्रेममात्रै परिपक्व हुने भुसालको भनाइ थियो ।

साहित्यकार आकाश पौडेलले प्रेमको परिभाषा यही हो भनेर किटान गर्न नसकिने बताउनुभयो । प्रेमलाई व्यक्तिअनुसार फरक फरक तरिकाले परिभाषित गर्न सकिने भन्दै घरपरिवार, साथीभाइ, आफन्त, युवायुवतीबीच हुने प्रेम फरक प्रकृतिका हुने बताउनुभयो । प्रेमले मानिसलाई नजिक बनाउने र जीउने आधार सिकाउने पौडेलको भनाइ थियो ।

सेन्ट्रल कलेजका प्रिन्सिपल यज्ञविलास (वाईबी) पौडेलले प्रेम सम्बन्धको बारेमा खुलेर कुरा गर्नुपर्ने बताउनुभयो । प्रेम सम्बन्ध भनेको एकअर्काबीचको विश्वासको वातावरण भएको भन्दै केही क्षणको आकर्षणलाई प्रेम भन्न नमिल्ने बताउनुभयो । युवायुवतीबीच सामान्य कुरामा खटपट भएको अवस्थामा सम्बन्ध बिग्रनसक्ने भन्दै पौडेलले त्यस्तो प्रेमका कारण दुखित हुन नहुने बताउनुभयो ।

कार्यक्रममा सहभागी विद्यार्थीहरुले प्रेमको सम्बन्ध तथा आफूहरुको भोगाइबारे छलफल गरेका थिए । किशोर तथा युवावस्थाका विद्यार्थीहरु सहभागी कार्यक्रममा उनीहरुले एउटा प्रेम असफल हुँदैमा जिन्दगी नै बिग्रिएको ठान्न नहुनेमा जोड दिँदै आफू अझ बलियो भएर अगाडि बढ्नुपर्ने बताएका थिए ।