गण्डकी प्रदेशका मुख्यमन्त्री खगराज अधिकारीले आज साँझसम्म मन्त्रिपरिषद विस्तार गर्ने तयारी गरेका छन् । गत पुस २५ गते मुख्यमन्त्रीमा नियुक्त भएका अधिकारी २९ गते प्रदेश संसद बैठकबाट विश्वासको मत लिएका थिए । मुख्यमन्त्री अधिकारीले हिजो आइतबार दलसँगको छलफलबाट मन्त्रालयको संख्यामा सहमति जुटाएपछि आज थप छलफल गरेर मन्त्रिपरिषद विस्तारको तयारी गरेका हुन् । 

सो प्रदेशमा नेकपा (एमाले), माओवादी केन्द्र र राप्रपाले भागबण्डामा मन्त्रालय बाँडफाँट गर्ने बताएका छन् । मन्त्रालयको संख्यामा करिब सहमति गरेका दलहरुले कुन मन्त्रालय कसलाई दिने बारेमा भने अन्तिम निर्णय गर्न बाँकी छ । त्यसबारे आज छलफल गरेर साँझसम्म मन्त्रिपरिषद विस्तार गर्ने तयारी रहेको मुख्यमन्त्री अधिकारीको सचिवालयले जनाएको छ ।  

सो प्रदेशमा एमालेका २१, माओवादीका ८ र राप्रपाका २ सांसदसहित ३१ सांसदले उनको पक्षमा मत हालेका थिए । एमालेका ज्येष्ठ सदस्य सांसद मित्रलाल बस्यालले सभामुखको भूमिका निर्वाह गर्दा विश्वासको मत दिने प्रक्रियामा भाग लिएका थिएनन् । नेपाली कांग्रेसका २७ सांसदले विपक्षमा मत हाले ।

एमालेले मुख्यमन्त्रीसहित ४ मन्त्रालय लिने दावी गरेको छ । त्यस्तै, माओवादीले २ मन्त्रालय र राप्रपालाई १ मन्त्रालय दिने तयारी दलको बैठकबाट गरिएको छ । संख्यामा करिब सहमति बने पनि मन्त्रालय भागबण्डामा अझै सहमति हुन बाँकी रहेको मुख्यमन्त्री अधिकारीको भनाइ छ । आजको बैठकबाट सहमति बनेमा साँझसम्म मन्त्रिपरिषद विस्तार हुन्छ, आजै सहमति नबने भोलिसम्म हुन्छ सचिवालयका एक सदस्यले भने । मुख्यमन्त्री अधिकारी अहिले विहानदेखि दलीय छलफलमा व्यस्त छन् ।