चितवन । तमू ल्होसार पर्वको तयारी अन्तिम चरणमा पुगेको छ। तमू समुदायको साझा संस्था तमू ह्युल छोँज धीँ गुरूङ राष्ट्रिय परिषद् चितवनले तमू ह्युल छोँज धीँको संग्रहालय महाबौद्ध गुम्बा परिषरमा ल्होसार मनाउने तयारी गरेको हो। ह्युल छोँज धीँले बुधबार पत्रकार सम्मेलन गरेर ल्होसारको तयारीबारे जानकारी गराएको हो। बाघ वर्ग (तोल्हो)लाई बिदाइ गर्दै बिरालो वर्ग (हिल्हो)लाई स्वागत गरेर यसवर्ष ल्होसार पर्व मनाउन लागिएको हो। 

तमू ह्युल छोँज धीँले हरेक वर्ष तीन चार दिनअघिदेखि नै ल्होसार पर्व मनाउँदै आइरहेको छ। पुस १५ गते विशेष दिन भए पनि १४ र १५ गते दुई दिनसम्म धुमधामका साथ मनाउँदै आएको ह्युल छोँज धीँ चितवनकी अध्यक्ष विमलादेवी गुरूङले जानकारी दिइन्। १४ गते राति तमू विद्यार्थी छोँज धीँ चितवनको संयोजकत्वमा विशेष सांस्कृतिक कार्यक्रम सञ्चालन हुने उनले बताइन्। सांस्कृतिक कार्यक्रममा राष्ट्रिय स्तरका कलाकारहरूको समेत उपस्थिति रहने उनको भनाइ छ। उनका अनुसार लोक तथा दोहोरी कलाकारहरू शितल गुरूङ, सविन गुरूङ र चिजा तामाङबाट प्रत्यक्ष दोहोरी गाउने कार्यक्र तय भएको छ। 

त्यसअघि आज (बिहीबार) बिहान हाजिरिजवाफ र छेलो प्रतियोगिता आयोजना गरिँदै छ। रस्साकस्सी, म्युजिकल चियर, घैँटो फुटाइलगायतका कार्यक्रमलाई समेत प्राथमिकतामा राखेको छ। प्रतियोगितात्मक कार्यक्रमबाट बिजेता हुनेलाई भने पुस १५ गते दिउँसो हुने औपचारिक कार्यक्रममा पुरस्कृत गरिने अध्यक्ष गुरूङले जानकारी दिइन्। १५ गते बिहान भरतपुरस्थित जयबुद्ध अस्पताल प्रालिको संयोजकत्वमा निःशुल्क स्वास्थ्य परीक्षण तथा खुला रक्तदान कार्यक्रमसमेत आयोजना गर्दैछ।