तनहूँ । आउँदो मंसिर ४ गते हुने संघ र प्रदेशसभा निर्वाचनको तयारी तीव्र रूपमा भइरहेको छ । विभिन्न दलका उम्मेदवार अहिले घरदैलो र मतदातालाई आफ्नो पक्षमा पार्न लागिपरेका छन् ।

यसै क्रममा गण्डकी प्रदेशका निवर्तमान् सांसद एवं निर्यात व्यावसायिक महासंघका अध्यक्ष राम बहादुर गुरुङ नेकपा एमालेबाट तनहूँ क्षेत्र नम्बर १ को प्रदेश नं. ‘क’ बाट प्रदेशसभा सदस्यका उम्मेदवार छन् । यस भन्दा अगाडी पनि यसै प्रदेशबाट चुनाव जितेका गुरुङले अघिल्लो कार्यकालमा सन्तोषजनक काम गरेको कारण यस क्षेत्रका जनताहरुको रोजाईमा गुरुङ नै रहेको देखिन्छ ।

नेपाली कांग्रेसका वरिष्ठ नेता नेता रामचन्द्र पौडलको पुरानो गाउँ व्यास ८ रिस्ति जानको लागि मोटररेवल पुल अत्यावश्यक भएकोले गुरुङकै पहलमा उक्त स्थानमा २ वटा मोटररेवल पुल निर्माण गर्न पहल गरेकै कारणले पनि गुरुङलाई आम मानिसहरुले सम्झिरहेका छन् । गण्डकी प्रदेश सरकारको महत्वाकांक्षी योजना एक घर एक धारा भने कार्यक्रम कार्यान्यवनमा पनि गुरुङकै सक्रिय सहभागिता रहेको थियो ।

गुरुङले पृथ्वी सुब्बा गुरुङ गण्डकी प्रदेशको मुख्यमन्त्री र तनहूँकै नेता किरण गुरुङ अर्थमन्त्री हुदा धेरै ठाउमा पुल, खानेपानी, बाटो, सामुदायिक भवन, होमस्टेहरु बनाउन आर्थिक सहयोग, वोटविरुवाहरु वितरण लगाएतका धेरै योजनाहरु सजिलैसंग आफ्नो क्षेत्रमा बजेट ल्याउन सकेको थियो ।

पार्टीले दिएको काम र जनताको अपेक्षा पुरा कहिल्यै नहच्किचाएको बताउने गुरुङ प्रदेशसभा सदस्य निर्वाचित भएर जनताका कामहरु धेरै गरेको र धेरै योजनाहरु अधुरा रहेको कारण पनि ति योजनाहरु लाई पुर्णरुप दिनको लागि फेरि उमेदवार बनेको बताउछन् ।

गण्डकी प्रदेशसभा सदस्य रहँदा आफुले जनतासगको भेटघाट र बिकास निर्माणका काममा खट्ने गरेको र कोभिड १९ को महामारीको समयमा समेत विकास निर्माणका धेरै कामहरु गरेको कारण जनताले यसपटक पनि आफुलाई भोट हालेर चुनावमा विजय गराउनेमा ढुक्क भएको उनले बताए ।