चुनावको तयारीमा जुट्न दलहरूलाई सरकारका प्रवक्ता गुरुङको आग्रह

इच्छाकामना न्युज

१८, पौष २०७७

चुनावको तयारीमा जुट्न दलहरूलाई सरकारका प्रवक्ता गुरुङको आग्रह

काठमाण्डौं, १८ पौष
सञ्चार तथा सूचना प्रविधिमन्त्री एवं सरकारका प्रवक्ता पार्वत गुरुङले वर्तमान सरकारलाई संवैधानिक तथा कानुनी रूपमा कुनै जटिलता नभएको बताउनुभएको छ ।
अहिलेको सरकार काम चलाउ हो कि भन्ने खालका प्रश्न उठेको भन्दै कोही पनि त्यस्ता भनाइको पछि लाग्न नहुने उहाँको भनाइ छ । मन्त्रिपरिषद्का निर्णयहरु जानकारी दिन हिजो आयोजित पत्रकार सम्मेलनमा बोल्दै प्रवक्ता गुरुङले नेपाल सरकारले गरेको निर्णयहरुमा कुनै पश्न उठ्न नसक्ने भन्दै कुनै भ्रममा नपर्न समेत आग्रह गर्नुभयो ।
सडकमा अभद्र नारा र अराजनीतिक गतिविधि भएको भन्दै नेपालको सर्वोच्च संस्था राष्ट्रपति र गणतन्त्र प्रति केही कतैबाट प्रश्न गरिएकोमा सरकारले खेद प्रकट गरेको समेत उहाँले बताउनुभयो । संसद पूर्नस्थापना भन्दा अहिले ताजा जनादेशमा जानु पर्ने अहिलेको आवश्यकता भएकोले विरोधभन्दा चुनावी तयारीमा जुट्न राजनीतिक दलहरुलाई प्रवक्ता गुरुङले आग्रह गर्नुभयो । सरकारले निर्वाचनको लागि सम्पूर्ण तयारी पुरा गरेको र यसै गरि निर्वाचन आयोगले पनि तयारी गरिरहेको उहाँले जानकारी दिनुभयो ।
सरकारले असंवैधानिक रुपमा प्रतिनिधिसभा विघटन गरी चुनावको मिति घोषणा गरेको भन्दै नेकपाको प्रचण्ड–नेपाल समूहलगायतका अरु राजनीतिक दलले भने सरकारको आलोचना गर्दै आएका छन् ।