नुवाकोट । पर्यटकिय मौसम सुरु भएसँगै रसुवामा भ्रमण गर्ने पर्यटकहरूको सङ्ख्या बढ्दै गएको छ । पर्यटकिय हिमाली रसुवामा हाल दैनिक पाँचसय पर्यटक पुगिरहेका छन् ।काठमाडौँदेखि नजिक रहेको र नेपालको तेस्रो पर्यटकीय गन्तव्यस्थल लाङटाङ तथा प्रसिद्ध धार्मिक क्षेत्र गोसाइँकुण्डमा आन्तरिक तथा बाह्य पर्यटकको आगमन उल्लेख्य मात्रामा बढेको लाङ्टाङ राष्ट्रिय निकुञ्जले जनाएको छ । रसुवामा विशेष गरि असोज–कार्तिक तथा बैशाख–जेठमा आन्तरिक तथा बाह्य पर्यटकहरू भ्रमणका लागि पुग्ने गरेका छन् ।

पदमार्ग पनि सुरक्षित भएकाले आन्तरिक तथा बाह्य गरी दैनिक पाँच सय जनाको हाराहारीमा पर्यटकको आवागमन भइरहेको लाङ्टाङ राष्ट्रिय निकुञ्ज कार्यालयले जनाएको छ ।प्रसिद्ध पर्यटकिय लाङटाङ क्षेत्रमा सात वर्ष अगाडिको विनासकारी भूकम्पपछि असामान्य भएको स्थानीयको दैनिकी पनि हाल पुरानै अवस्थामा फर्किएको पर्यटन व्यवसायी भीम पौडेलले बताउनुभयो । २०७२ सालको भूकम्प अघि वार्षिक १७ हजार बाह्य पर्यटकले भ्रमण गर्ने लाङटाङ क्षेत्रमा अहिले बाह्य पर्यटकसहित आन्तरिक पर्यटकको आवागमन बढेको हो ।

लाङटाङ र गोसाइँकुण्ड जाने स्वदेशी पर्यटकहरुसँग प्रवेश शुल्क लिन थालेपछि तथ्याङ्क राख्न थालिएको निकुञ्जले जनाएको छ ।निकुञ्जले स्वदेशी पर्यटकसँग एक सय रुपैयाँ र बिदेशी पर्यटकहरुसँग तीन हजार रुपैयाँका दरले प्रवेश शुल्क लिँदै आएको छ । सो स्थानमा आउने पर्यटकले गणेश तथा लाङटाङ हिमालको मनोरम दृश्य, निकुञ्ज क्षेत्रभित्रका जैविक विविधता, दुर्लभ वन्यजन्तु रेडपान्डा, हिमचितुवा र कस्तूरी मृगलगायत जीवजन्तु रामसारमा सूचीकृत धार्मिक तीर्थस्थल गोसाइँकुण्ड, तामाङ सम्पदामार्ग भित्र रहेको तामाङ कला र संस्कृति अवलोकन गर्ने पाउने छन् ।