डिबी खड्का, गुल्मी । गुल्मी सदरमुकाम तम्घासदेखि सिमलटारीसम्मको ४ ओटा खोलामा पुल नहुँदा स्थानीयवासीले सास्ती खेप्दै आइरहेका छन् । गुल्मी सदरमुकाम तम्घासदेखि पश्चिम क्षेत्रको मुख्य सडक मदन भण्डारी राजमार्ग हो ।

सदरमुकाम तम्घास देखी सिमलटारीसम्म २७ किलोमिटर सडक कालोपत्रे गरेको पाँच वर्ष भए पनि त्यस सडकखण्ड अन्तर्गत पर्ने चारवटा खोलामा पुल नहुँदा स्थानीयले सास्ती ब्यहोर्दै आएका हुन् । चार स्थानीय तह, धुर्कोट, मदाने, मालिका, इस्मा गाउँपालिका जोड्ने यो सडक भएर दैनिक सयौँ सवारी साधन गुड्छन् ।  

हिउँदमा जेनतेन सवारी साधन चलेपनि वर्षायाममा यस क्षेत्रका जनताले निकै जोखिम मोलेर यात्रा गर्नुपर्छ । खोलामा पुल नभएकै कारण बिरामी र यात्रुलाई सबैभन्दा बढि सास्ती हुने गरेको विद्यार्थी बसु क्षेत्रीले बताउनुभयो । महत्पुर्ण काम लिएर सदरमुकाम तम्घास हिँडे पनि समयमै पुगिन्छ की पुगिदैन् भन्ने टुङ्गो नभए पनि जनता जोखिम मोलेर यात्रा गर्न बाध्य छन् ।

बाटो कालोपत्रे भएपनि पुल नहुदाँ धेरै दुख पाएको स्थानीयवासी एवं यात्रु सुर्य बहादुर जिसीले बताउनुभयो । सवारी चालक पनि पुल नहुँदा सास्ती भएको गुनासो गर्छन् । जोखिम मोलेर खोलाबाट सवारी साधन तार्दा अप्ठ्यारो हुने चालक गोपाल घर्तीले बताउनुभयो ।

मदन भण्डारी राजमार्गको कार्यालय तम्घासले भने पुल निर्माण गर्ने प्रक्रिया अगाडी बढेको दाबी गरेको छ । जिल्लाका पाँच स्थानीय तहका हजारौँ यात्रुहरू दैनिक यात्रा गर्ने मुख्य सडकमै पुल नहुँदा निकै समस्या भोग्नु परेको गुनासो गर्छन् । तर तीनै तहका सरकारले स्थानीयको गुनासो तत्काल सम्बोधनमा चासो देखाएका छैनन् ।