नेकपा भित्रको विवादलाई लिएर संसद् विघटन गर्नु गलत भएको प्रचण्डको भनाइ

इच्छाकामना न्युज

१३, पौष २०७७

नेकपा भित्रको विवादलाई लिएर संसद् विघटन गर्नु गलत भएको प्रचण्डको भनाइ

काठमाण्डौ, १३ पुस । नेकपा अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओलीले आफूसँग हुँदै नभएको अधिकार प्रयोग गरेर संसद् विघटन गरी संघर्षबाट प्राप्त उपलब्धिलाई खतरामा पारेको बताउनुभएको छ । ७० वर्ष लडेर प्राप्त गरेको उपलब्धि माथि कम्युनिष्ट पार्टी भित्रैबाट क्रुर प्रहार भएको उहाँले बताउनुभयो ।
पार्टीको भातृ संगठनले आज पेरिस डाँडामा आयोजना गरेको कार्यक्रममाप्रचण्डले कम्युनिष्ट पार्टी भित्र ठूलो सांस्कृतिक, वैचारिक विचलन देखापरेको धारणा राख्नुभयो । ७० वर्ष लडेर ल्याएका उपलब्धि माथि क्रुर प्रहार भएको प्रचण्डको टिप्पणी थियो । २०४७ सालको संविधानले प्रधानमन्त्रीलाई संसद् विघटन गर्ने अधिकार दिएको र त्यसको दुरुपयोग भएको कुराबाट शिक्षा लिएर अहिलेको संविधानमा त्यो अधिकार कटौती गरिएको अध्यक्ष प्रचण्डले बताउनुभयो । नेकपा भित्रको आन्तरिक विवादलाई लिएर संसद् विघटन गर्नु गलत भएको उहाँको भनाइ थियो ।
प्रधानमन्त्री ओलीले आफूसँग संवैधानिक रूपमा नभएको अधिकार प्रयोग गरेर संसद् विघटन गरेकाले संसद् जीवित रहेको दाहालको भनाइ थियो । संसद् विघटनको असंवैधानिक कदम चालेको ओलीको सरकार विघटन भएको प्रचण्डले बताउनुभयो ।