सिन्धुपाल्चोकका ४६ विद्यालयहरूमा नर्सको व्यवस्था, कार्यक्रम प्रभावकारी बन्दै

इच्छाकामना न्युज

१७, भाद्र २०७९

सिन्धुपाल्चोकका ४६ विद्यालयहरूमा नर्सको व्यवस्था, कार्यक्रम प्रभावकारी बन्दै

सागर खड्का, सिन्धुपाल्चोक । बागमती प्रदेश सरकारले चलाएको एक विद्यालय एक नर्स कार्यक्रम लागु भएपछि सिन्धुपाल्चोकका विद्यार्थीलाई सहज भएको छ । पढाई भइरहेकै बेलामा सामान्य चोटपटक लाग्दा वा स्वास्थ्यमा सामान्य समस्या हुँदा पढाइ नै छोडेर घर जानुपर्ने बाध्यता रहे पनि यो कार्यक्रमपछि अधिकांश विद्यार्थीको पढाइ छुटेको छैन ।

विद्यालयमै नर्सको व्यवस्था भएपछि कक्षा छुटेको छैन भने कोही बिरामी भए आराम कक्षको सुविधा छ भने महिनावारी भइ हालेमा विद्यालयमै सेनेटरी प्याड उपलब्ध छ । कसैलाई चोटपटक लागे विद्यालयमै प्राथमिक उपचार हुन्छ ।

सम्बन्धित व्यक्तिबाटै स्वास्थ्य र सरसफाईबारे जानकारी पाउन थालेपछि विद्यार्थी पनि सचेत बन्न थालेको विद्यालयका नर्स अस्मिता केसीले बताउनुभयो । विद्यार्थीको उपचार मात्र नभइ फोहोर व्यवस्थापन, वातावरणीय सरसफाइ, पोषण, व्यक्तिगत सरसफाइ लगायतमा पनि सुधार भएको छ ।

हालसम्म जिल्लाका ४६ वटा माध्यमिक विद्यालयहरूमा ‘एक विद्यालय, एक नर्स’ कार्यक्रम सञ्चालनमा छ । प्राथमिक उपचारको सामग्री तथा औषधिसहित विद्यालयमा नियमित खटिने नर्सले समुदायमा नै स्वास्थ्य सम्बन्धी सचेतना फैलाउन मद्दत पुगेपछि मुलुकभरकै विद्यालयमा अनिवार्य नर्सको व्यवस्था हुनुपर्ने आवाज पनि उठिरहेको छ ।