भरतपुर । नेपाल आदिवासी जनजाति पत्रकार महासंघ (फोनिज) चितवनले नेपाल पत्रकार महासंघ चितवनलाई ज्ञापनपत्र बुझाएको छ । फोनिजले नेपाल पत्रकार महासंघको संस्थापक अध्यक्ष सत्यनारायणबहादुर श्रेष्ठ नै भएको दाबी गर्दै बिहीबार शाखा मार्फत केन्द्रलाई ज्ञापनपत्र बुझाएको हो ।

नेपाल पत्रकार महासंघले भने पूर्वप्रधानमन्त्रीसमेत रहेका नेता कृष्णप्रसाद भट्टराईलाई संस्थापक अध्यक्ष मान्दै आएको छ । आदिवासी जनजाति पत्रकारहरूले भने सत्यनारायणबहादुर श्रेष्ठ नै संस्थापक अध्यक्ष भएको दाबी गर्दै विगत लामो समयदेखि आन्दोलन गर्दै आइरहेको छ ।

नेपाल पत्रकार महासंघको ध्यानाकर्षण गराउँदै फोनिजले देशभरका सबै जिल्ला शाखामार्फत आज बुझाएको हो । फोनिजको केन्द्रीय समितिले गरेको निर्णयानुसार फोनिजको चितवन शाखाले पत्रकार महासंघको चितवन शाखालाई ज्ञापनपत्र बुझाएका हुन् ।

पत्रकार महासंघले वास्तविकता विपरीत निर्णय गरी तत्कालीन नेपाल पत्रकार संघको केन्द्रीय अध्यक्ष भट्टराई हो भन्दै आदिवासी जनजाति माथि अन्याय गरेको फोनिजको ठहर छ । विगतका इतिहास र विभिन्न खालका तथ्य–तथ्यांकले पनि पत्रकार महासंघको अध्यक्ष श्रेष्ठ नै भएको फोनिजले बताउँदै आएको छ ।

वि.सं. २०१२ चैत १६ गते तत्कालीन अवस्थामा ‘नेपाल पत्रकार संघ’ पुनर्गठन भएपछि बल्ल कृष्णप्रसाद भट्टराई सभापति बनेको फोनिजले बुझाएको ज्ञापनपत्रमा उल्लेख छ । ज्ञापनपत्रमा भनिएको छ,– वि.सं. २००८ साल वैशाख ९ गतेको भेलाले श्रेष्ठको नेतृत्वमा नेपाल पत्रकार संघ गठन भएको इतिहास छ ।

फोनिजसँग भएको तथ्यांकबारे जानकारी गराउँदै फोनिज चितवनका अध्यक्ष रमेश रानामगरले भने, २००९ साल वैशाख २८ गते पुनः श्रेष्ठकै सभापतित्वमा तत्कालीन नेपाल पत्रकार संघ गठन भएको पाइन्छ । त्यसैले सत्यनारायणबहादुर श्रेष्ठ नै नेपालको पत्रकार महासंघमा संस्थापक अध्यक्ष भएको उनको भनाइ थियो ।