रत्ननगर । तमू ह्युल छोँज धीँ गुरूङ राष्ट्रिय परिषद रत्ननगर नगर समितिले पदभार ग्रहण गरेको छ । केही दिनअघि गठित कार्यसमितिले बुधबार तमू ह्युल छोँज धीँका केन्द्रीय सचिव सन्तलाल गुरूङको उपस्थितिमा पदभार ग्रहण गरेको हो । ऋषिराम गुरूङ नेतृत्वको ११ सदस्यीय समितिलाई केन्द्रीय सचिव गुरूङले सपथग्रहण गराएका हुन् ।

सपथग्रहणपछि नगर अध्यक्ष गुरूङले रत्ननगर नगरपालिका बसोबास गर्दैै आएका गुरूङ समुदायलाई एकताको विन्दुमा ल्याउनको लागि नगर समिति गठन भएको जानकारी गराए । ‘अबदेखि रत्ननगर नगरपालिकाका गुरूङहरू पनि एकतामा बाँधिएका छाँै,’ उनले भने, ‘यसले गुरूङ समुदायको लागि हरेक समस्यामा समाधानसहितको काम गर्नेछ ।’

सपथग्रहण गराएपछि केन्द्रीय सचिव सन्तलाल गुरूङले गुरूङ समुदायलाई एकतामा ल्याउनको लागि ह्युल छोँज धीँको भूमिका मह¤वपूर्ण रहेको हुँदा देशभरको गुरूङ समुदायले ह्युल छोँज धीँको आवश्यकता महसुस गरेको बताए । चितवनमा पनि इच्छाकामना, माडी र रत्ननगर नगरपालिकामा नगर समिति गठन भइसकेकोले अब बाँकी पालिकामा पनि छिट्टै समिति गठन गर्ने तयारीमा रहेको जानकारी गराए ।

ह्युल छोँज धीँको विषयमा प्रशिक्षण दिँदै सचिव गुरूङले भने, ‘कुनै पनि व्यक्ति संगठनमा जोडिएपछि उसले गर्ने योगदान फरक हुन्छ । अब तपाइँहरूले हिजो संगठित नहुँदा पनि तमू ह्युललाई सहयोग गर्नुभएको थियो । अब संगठित भइसकेपछि पनि सहयोग त छँदैछ । तर, संगठित हुँदा र नहुँदाको अवस्थामा धेरै नै फरक पाइन्छ ।’

ह्युल छोँज धीँ चितवनकी उपाध्यक्ष विमला गुरूङले चितवन जिल्लाको अधिवेशन यही भदौ १८ गते हुन लागेको जानकारी गराउँदै गुरूङ समुदायको हरेक गतिविधिमा ह्युल छोँज धीँको भूमिका निकै महत्त्वपूर्ण रहने बताइन् ।