कांग्रेस केन्द्रीय सदस्य टेकप्रसाद गुरुङले चितवन क्षेत्र नं ३ आफ्नो पार्टीलाई दिइनुपर्ने बताउँछन् । जिल्लाको पूर्व पार्टी सभापतिसमेत रहेका गुरुङले भरतपुर महानगरमा कांग्रेसले दुई पटकसम्म सहयोग गरिसकेकाले अब क्षेत्र नं ३ कांग्रेसलाई दिनुपर्ने बताउँछन् । ‘फेरि पनि गठबन्धनले प्रचण्डलाई ३ नम्बर क्षेत्रबाट उमेदवार बनाउने हो भने चितवनमा कांग्रेस नरहने भयो। त्यसैले त्यो क्षेत्र हामीलाई दिनुपर्छ’, उनले भने ।

कांग्रेसका हालका जिल्ला सभापति खनालले पनि एक टेलिभिजन कार्यक्रम मार्फत प्रचण्डलाई अन्यत्र क्षेत्र रोज्न सुझाव दिएका थिए । यद्यपी जिल्ला स्तरका नेताको विरोधले केन्द्रिय सभापतिलाई केहि फरक नपर्ने गरेको विगतको उदाहरण छ ।

चितवनका तीन क्षेत्रमध्ये सत्ता गठबन्धन तुलनात्मक रूपमा सबैभन्दा बलियो रहेको तीन नम्बरलाई नै मानिन्छ। अघिल्लो चुनावमा नेकपा एमालेसँग तालमेल गरेका प्रचण्डले त्यही क्षेत्रबाट जितेका हुन्। करिब नौ हजार मतको अन्तरले उनले राप्रपाका विक्रम पाण्डेलाई पराजित गरेका थिए। प्रचण्डले ४८ हजार २७६ र पाण्डेले ३८ हजार ९३५ भोट पाएका थिए।

माओवादी केन्द्रको नेताहरु भने प्रचण्डले कुनै हालतमा क्षेत्र छाड्ने अवस्था नहरेको दाबी गर्छन् । एक्लै चुनाव लड्दा पनि जित्न सक्ने आधार माओवादीले बनाएको उनीहरुको दाबी छ । प्रचण्डका भाई नारायण दाहालले पनि कांग्रेसको केन्द्रिय नेतृत्वबाट प्रचण्ड क्षेत्र नं ३ बाट हट्नुपर्छ भनेर कसैले नभनेको भन्दै प्रचण्ड यहि क्षेत्रबाट चुनाव लड्ने बताउँछन् ।

यसअघि प्रचण्ड रोल्पा, काठमाडौँ र सिराहाबाट उमेदवार बनेका थिए। कांग्रेसका कतिपय नेताहरु अहिले प्रचण्डलाई जोखिमपूर्ण क्षेत्रमा पठाउने कोशिस गरेका छन् ।

भरतपुर महानगरपालिकाका २९ मध्ये १९ वटा वडा र नौवटा वडा रहेको माडी नगरपालिका उक्त क्षेत्रमा पर्छन्।
गत स्थानीय तह चुनावमा वडाध्यक्षले पाएको कुल मतपरिणाम हेर्दा त्यहाँ सत्तापक्षका तीन प्रमुख दलले ४५ हजार ३२० मत पाएका थिए। नेकपा एमालेले २९ हजार ८५१ र राप्रपाले ६ हजार १९८ भोट पाएका छन्।

दलगत रूपमा कांग्रेस २९ हजार ३४३ मतका साथ दोस्रो र माओवादी १० हजार ९४० मतका साथ तेस्रो स्थानमा छन्। एकीकृत समाजवादीले ५ हजार ३७ मत पाएको थियो। यद्यपि उक्त मतपरिणामले सत्तापक्षीय गठबन्धनका दलहरूको वास्तविक हैसियत भने देखाउँदैन ।

किनकि त्यस क्षेत्रमा पर्ने भरतपुर महानगरका १९ वटा वडामध्ये १३ वडाध्यक्षमा मात्र उम्मेदवारी दिएको कांग्रेसले २६ हजार ७६२ मत, पाँचवटा वडामा अध्यक्षका उमेदवार बनाएको माओवादीले ७ हजार १०० मत र तीन वडामा अध्यक्षको उम्मेदवार बनाएको नेकपा एकीकृत समाजवादीले ३ हजार ४४९ मत पाएका थिए।

एमालेले १८ वडामा उमेदवार बनाएर २४ हजार ५७३ मत र सात वटा वडाध्यक्ष उठाएको राप्रपाले एक हजार ९२८ मत पाएको थियो। माडीका नौ वडामध्ये सबैमा उम्मेदवारी दिएका दलहरूमा एमाले ५ हजार २७८ मतका साथ पहिलो र ४ हजार २७० मतका साथ राप्रपा दोस्रो स्थानमा रहे।

चार÷चार वटा वडामा उम्मेदवारी दिएका माओवादीले ३ हजार ८४० र कांग्रेसले २ हजार ५८१ मत पाए। दुई वडामा उम्मेदवारी दिएको नेकपा एकीकृत समाजवादीले एक हजार ५८८ मत पाएको छ।

क्षेत्र नम्बर ३ मा एमाले र राप्रपाभन्दा सत्ता गठबन्धन झन्डै १० हजार ००० मतले अघि देखिए पनि तालमेलका कारण वडाको मतपरिणामका आधारमा दलहरूको वास्तविक हैसियत भन्न नसकिने बताइन्छ।

बिबिसी नेपालीबाट साभार