संसदीय निर्वाचनको लागि दर्ता भएका राजनीतिक दलका निवेदन अध्ययन गर्दै निर्वाचन आयोग

इच्छाकामना न्युज

४, भाद्र २०७९

संसदीय निर्वाचनको लागि दर्ता भएका राजनीतिक दलका निवेदन अध्ययन गर्दै निर्वाचन आयोग

काठमाण्डौ । निर्वाचन आयोगले आगामी मङ्सिर ४ गते हुने संसदीय निर्वाचनको लागि दर्ता भएका राजनीतिक दलका निवेदन अध्ययन गरिरहेको छ । आगामी निर्वाचन प्रयोजनका लागि आयोगमा ८४ दल दर्ता भएका छन् ।

ती दलहरूले दर्ताका लागि बुझाएको आवश्यक कागजात माथि जाँच बुझ गरिरहेको निर्वाचन आयोगका प्रवक्ता शालिग्राम शर्मा पौडेलले जानकारी दिनुभयो । जाँचबुझका क्रममा दलहरूले बुझाउनुपर्ने कागजात नपुगेमा वा अस्पष्ट भएमा पुनः कागजात माग्ने उहाँले बताउनुभयो ।

आयोगले आगामी भदौ ८ गते दर्ता भएका दलको अन्तिम विवरण प्रकाशन गर्ने तयारी गरेको छ । विवरण प्रकाशन गरेपछि उनीहरूले संघ, प्रदेश, प्रत्यक्ष तथा समानुपातिक निर्वाचनमा सहभागी हुनका लागि निवेदन दिनुपर्ने उहाँले बताउनुभयो ।

राजनीतिक दलहरूले असोज २ र ३ गते समानुपातिक तर्फको निर्वाचनका लागि बन्द सूची बुझाउने कार्यसूची रहेको छ । यस्तै निर्वाचनका लागि आवश्यक पर्ने सामग्रीको खरिद प्रक्रिया सुरु गरिएको पनि उहाँले बताउनुभयो ।

आयोगले आगामी भदौ २० गतेदेखि समानुपातिक तर्फको मतपत्र छपाई सुरु गर्ने तयारी गरेको छ । आयोग सहित राजनितिक दलहरू पनि निर्वाचनको तयारीमा जुटिरहेका छन् ।

सत्ता गठबन्धनमा भने निर्वाचनका लागि सिट बाँडफाँटको विषय पेचिलो बन्दै गएको छ । सिट बाँडफाँटका लागि ११ सदस्यीय कार्यदल गठन गरेपनि कुरा मिल्न सकेको छैन । प्रतिनिधिसभा र प्रदेशसभामा कुन दललाई कति सिट भागबण्डा गर्ने भन्नेमा कार्यदलमा कुरा नमिलेपछि कार्यदल सदस्यले शीर्ष नेतासँग छलफल गरेर मापदण्ड तयार गर्ने जनाएको छ ।