रोशन तिवारी, पर्वत । पर्वतमा अनुदानकै लागि फर्म दर्ता गर्ने, कागजमा बनेको फर्मका आधारमा अनुदान लिने र अनुदानका कार्यक्रम सकिएपछि पुरानो फार्म स्थगित गरेर पुनः नयाँ दर्ता गर्ने विकृतिहरू देखिन थालेका छन् ।

माटोमा खेती गर्ने भन्दा झोलामा खेती गर्नेले अनूदान पाउँदै आएको फलेबास ३ का काशिराम पराजुलीले गुनासो गर्नुभयो । पर्वतको जनसङ्ख्याको अनुपातमा वर्षभरि ३१ हजार ८ सय ९२ टन खाद्यान्न आवश्यक देखिन्छ । धान, मकै, कोदो, गहुँसमेतको उत्पादन जोड्दा २९ हजार ४ सय ६५ हेक्टर मात्रै उत्पादन हुन्छ । अझै २ हजार ४ सय २७ टन खाद्यान्न अपुग हुन्छ ।

ज्ञान केन्द्रकै तथ्याङ्कअनुसार १३ हजार टन तरकारी आवश्यक पर्नेमा ९ हजार ५ सय टन उत्पादन हुन्छ  । ४ हजार ८ सय टन दलहन बाली आवश्यक पर्नेमा ५ सय टन मात्रै उत्पादन हुन्छ । १ हजार ६ सय टन तेलहन आवश्यक पर्नेमा १२० टन मात्रै फल्छ । अनुदान दिएर नभई भूमीको वर्गिकरण गर्दा उत्पादन बढ्न सक्ने किसान शिव अधिकारीले बताउनुभयो ।

फलेबास ६ देविस्थानका अगुवा किसान भरत श्रेष्ठका अनुसार किसानहरु प्रविधिसँग नजिकिन चाहन्छन् । जलवायू परिवर्तनको असर र नयाँ नयाँ रोगका कारण बालीनाली फस्टाउन सकेको छैन । त्यसैले किसानलाई अनूदान र आश्वसनभन्दा सीप चाहिएको श्रेष्ठले बताउनुभयो । आठ वर्षमा धानबाहेक हिउँदे खेतीको उत्पादन क्रमशः घट्दो क्रममा छ  ।

मूख्य बालीका रूपमा रहेको धानकै उत्पादन समेत सन्तोषजनक छैन । कृषि ज्ञान केन्दसँगै स्थानीय सरकारले पनि यान्त्रिक उपकरण, साना सिँचाई, टनेल, मल बीउ लगायतका शिर्षकमा अनूदान वितरण गरिरहेका छन् । तर, उपलब्धी भने उत्साहजनक देखिएको छैन ।