नवराज महतारा, हुम्ला । हुम्लासँग जोडिएको चीनको सीमानाका ठप्प छ । राष्ट्रिय राजमार्गसँग नजोडिएको र जिल्ला सदरमुकाम सिमकोट आवत जावत गर्न वर्षको ६ महिना मात्रै बाटो खुल्ने हुम्लामासीमानाका बन्द भएपछि दैनिक उपभोग्य वस्तुको जोहो गर्न समेत सकस हुन थालेको छ ।

उत्तरी हुम्लाको नाम्खा गाउँपालिकाको लिमि, यारी, हिल्साका नागरिकका लागि नुनदेखि उनसम्मका दैनिक उपभोग्य सामग्रीका लागि छिमेकी चीनको स्वशासित क्षेत्र तिब्बतको ताक्लाकोट बजारमै भर पर्नु पर्छ । कोरोना सङ्क्रमणले गएको तीन वर्षदेखि उक्त नाका पूर्ण रुपमा बन्द छ ।

स्थानीय उत्पादनले वर्षको तीन महिनापनि नपुग्ने नाम्खाका तिल, हल्जी, जाङ्ग, यारी, हिल्सा लगायतका बस्तीका नागरिकलाई दैनिक उपभोग्य वस्तु कसरी पु¥याउने भन्ने सकस छ । सीमानाका लामो समय बन्द भएपछि स्थानीय नागरिकलाई घरदेखि नजिकै पर्ने रोजगारको भरपर्दो माध्यम पनि बन्द भएको छ ।

चीनको ताक्लाकोट बजारमा आफूले नियमित रुपमा गर्दै आएको रोजगार समेत बन्द भएपछि परिवार पाल्नै मुस्किल भएको नाम्खाका स्थानीय लालबहादुर लामाको दुखेसो छ ।

कोरोना सङ्क्रमणको दरमा केही कमी आएसँगै स्थानीय सरकार र स्थानीय प्रशासनले नाका खोल्न चीनको स्थानीय प्रशासन र नेपाल सरकारलाई लिखित र मौखिक रुपमा आग्रह गर्दै आएको छ । तरपनि दुई देशबीच कोभिड प्रोटोकल तयार नभएको भन्दै नाका खुलेको छैन ।

नागरिक र स्थानीय सरकारको आग्रहमा गृहमन्त्रालय र परराष्ट्र मन्त्रालय मार्फत सरकारलाई ताकेता गरेपनि अहिलेसम्म नाका खोल्ने विषयमा स्थानीय प्रशासन समक्ष कुनै सूचना नआएको हुम्लाका सहायक प्रमुख जिल्ला अधिकारी अनुपम पौडेलले बताउनुभयो ।

कोरोना सङ्क्रमणको कारण देखाउँदै चीनसँगकोसीमा जोडिएको हिल्सा नाका बन्द भएपछि नाम्खा गाउँपालिकाकाबासिन्दाको दैनिक रोजिरोटी खोएिको छ भने जनैपूर्णिमाको अवसर पारेर कैलाश मानसरोवरको दर्शन गर्न जाने बाजुरा, मुगु र हुम्लादेखिका सयौँ धामी डाँगरहरूको दर्शन गर्ने बाटोसमेत बन्द भएको छ ।