धनकुटाको सिँधुवा आसपासका किसान धनियाँ खेतीबाट मनग्य आम्दानी गर्दै

इच्छाकामना न्युज

१८, श्रावण २०७९

धनकुटाको सिँधुवा आसपासका किसान धनियाँ खेतीबाट मनग्य आम्दानी गर्दै

अनिता भट्टराई, धनकुटा । तरकारी उत्पादनका लागि परिचित धनकुटाको सिँधुवा आसपासका किसान धनियाँ खेतीबाट मनग्य आम्दानी गरिरहेका छन् । धनियाँको साग बिक्रिबाट छोटो समयमा राम्रो आम्दानी हुने भएपछि किसानहरू व्यावसायिक रूपमा धनियाँ खेतीमा लागेका हुन् । सिँधुवामा लगभग साढे ३ सयभन्दा बढी किसानले व्यावसायिक रूपमा धनियाँ खेती गरेका छन् ।

एक जना किसानले लगभग ७० हजार रुपैयाँ आम्दानी धनियाँको साग बिक्रीबाट नै गर्ने गरेका छन् । छोटो समयमा नै आम्दानी दिने भए पनि त्यति नै छिटो बिग्रिने भएकाले नोक्सानी पनि हुने गरेको किसान चेतबहादुर थापाले बताउनुभयो । धनकुटाको छथर जोरपार्टी गाउँपालिकाप्रदेश नम्बर १ को सबैभन्दा बढी तरकारी उत्पादन हुने क्षेत्र अन्र्तगत पर्छ ।

यहाँ उत्पादन भएका तरकारीपूर्वी नेपालको धरान, विराटनगर, झापा हुँदै भारतको सिलगुढी र पश्चिम बङ्गालका विभिन्न स्थानहरूसम्ममा बिक्री हुने गरेको छ । सिँधुवा क्षेत्रबाट मात्र एक दिनमा ३० देखि ४५ हजार मुठासम्म धनियाँको साग बजारसम्म पुगेको सिँधुवा कृषि भण्डारका प्रमुख मेघेन्द्र गुरुङले बताउनुभयो ।

धनकुटाको सिँधुवाबाट मात्रै गत आर्थिक वर्षमा ३५ करोड रूपैँयाको तरकारी भारत निकासी भएको छ । आलु, बन्दाकोपी, मुला, केराउ लगायतका तरकारी खेती गर्ने किसानहरू केही वर्ष यता धनियाको साग उत्पादनमा सक्रिय बनेका हुन् । उत्पादित धनियाँको सागको बजारिकरण बढाउन सके अझै बढि फाइदा हुने किसानहरू बताउँछन् ।