ओमप्रकाश पाण्डेय, कञ्चनपुर, १८ असार । चुरे क्षेत्र संरक्षणको लागि विभिन्न कार्यहरू गरिए पनि कञ्चनपुरको चुरे क्षेत्र मासिँदै जान थालेको छ । विभिन्न सामुदायिक वन उपभोक्ता समितिहरूले आ–आफ्नो वन क्षेत्र संरक्षणका लागि पहल गरिरहेकाभएपनि चुरेको संरक्षणमा ध्यान दिन नसक्दा चुरे विनाश हुँदै गईरहेको संरक्षणकर्मीहरूले बताएका छन् ।

स्थानीय सरकार आएपछि यसको संरक्षण हुने आसा गरिएको भएपनि त्यसो हुन नसकेको सरोकारवालाको भनाइ छ । नेपालमा ७ वटै प्रदेश, ३७ जिल्ला र ३ सय ४० स्थानीय तहमा फैलिएको चुरे क्षेत्रको संरक्षणका लागि पर्याप्त पहल हुन नसकेको जानकारहरूले बताउने गरेका छन् । सरकारले पनि चुरे क्षेत्रको विकासका लागि भन्दै २०७१ साल असार २ गते राष्ट्रपति चुरे तराई मधेश संरक्षण समिति गठन गरेको थियो ।

समिति मार्फत करोडौँ खर्च भए पनि चुरेको विनाश नरोकिएको सरोकारवालाको गुनासो छ । चुरे क्षेत्रमा अमूल्य जडिबुटी, बोटविरुवा, जीवजन्तु र पानीको मुहान पनि रहेको छ ।  चुरे क्षेत्र संरक्षणको लागि चुरे क्षेत्रमा पर्ने स्थानीय सरकारले विशेष भूमिका खेल्नुपर्ने चुरे संरक्षण सञ्जालका अध्यक्ष रविन्द्र कुँवरले बताउनुभयो ।

चुरे संरक्षणका लागि छुट्टै कार्यक्रम नरहेको भए पनि आफुहरूले सरोकारवाला निकायसँग समन्वय गर्दै चुरे संरक्षणका लागि काम गरि रहेको डिभिजन वन कार्यालय कञ्चनपुरका डिभिजनल वन अधिकृत शम्भु प्रसाद तिवारीले बताउनुभयो । चुरे क्षेत्रको संरक्षणले जैविक विविधताको संरक्षणमा टेवा पु¥याउनुका साथै जल सम्पदा तथा भुसम्पदाहरूको समेत संरक्षण हुने भएकाले चुरेको संरक्षणमा लाग्नुपर्नेमा सरोकारवालको जोड रहेको छ ।