मान बहादुर कुँवर, जुम्ला, १४ असार । जुम्लाको चौधबीसमा खुलेको ऋणमोक्ष मा.वि. डिल्लीचौरको शैक्षिक गुणस्तर लयमा फर्कदै आएको छ ।

बेलायत, जापान र जर्मन सरकारको आर्थिक सहयोगमा सुविधाजनक भवन, बिजुली बत्ति, शैक्षिक सामग्री र छात्रावासको व्यवस्थापनसहितको विद्यालयको गूणस्तरबीचमा खस्किएको थियो । तर पछिल्लो समय विद्यालयको शैक्षिक गुणस्तर सुधार हुँदै गएको छ ।

फराकिलो खेल मैदान रहेको विद्यालयमा विद्यार्थीहरू समयमा नै विद्यालय पुग्छन् भने नियमित रूपमा दैनिक प्रार्थनामा सहभागि हुन्छन् । विद्यालयमा कम्युटर ल्याबसहित व्यवस्थित विज्ञान प्रयोगशाला, कम्प्युटर कक्षा, खेल मैदान, पुस्तकालयको समेत व्यवस्था छ । ६ सय विद्यार्थी अध्ययनरत विद्यालयमा २१ जना शिक्षक छन् ।

शिक्षा तथा मानव स्रोतको सहयोगमा अहिले छात्रावास पनि चलिरहेको विद्यालयका शिक्षक लक्ष्मिकान्त जैसीले जानकारी दिनुभयो । डिल्लीचौरमा रहेको हिमाली छात्रावासमा ५० जना छात्राहरू छन् । विद्यालयमा सेनेटरी प्याड निशूल्क रूपमा वितरण हुने गरेको छ । जसका कारण विद्यालय अनुपस्थित हुने दर पनि घटेको छात्रा पुनम बुढाले बताउनुभयो ।

यार्सा टिप्ने समयमा रित्तो हुने विद्यालयमा विद्यार्थीको सङ्ख्या घटेको छैन । नेपालका पहिलो मानवशास्त्री प्राध्यापक डा. डोर बहादुर बिष्टको पहलमा वि.स.ं २०५० सालमा विद्यालयको स्थापना भएको प्रधानाध्यापक हरि बहादुर बुढाले जानकारी दिनुभयो ।

विद्यालय स्थापनाको काम सकेर २०५२ सालमा जुम्लाबाट फर्किनुभएका बिष्टको अवस्था त्यसयता अज्ञात छ । तर उहाँले स्थापना गरेको ऋण मोक्ष मा.वि. को शैक्षिकस्तर भने बढ्दै जाँदा पातारासी क्षेत्रको मात्रै नभएर जुम्लाकै शैक्षिक धरोहर बन्दै गइरहेको छ ।