ओम प्रकाश पाण्डेय, कञ्चनपुर, १४ असार । सुदुरपश्चिम प्रदेशमा भ्रष्टाचार विरूद्धका उजुरीहरू बढिरहेका छन् । अख्तियार दुरुपयोग अनुसन्धान आयोगका अनुसार सुदुरपश्चिममा खासगरी स्थानीय तहसँग सम्बन्धित उजुरीहरू दर्ता हुने क्रम बढ्दै गएको छ ।

अख्तियार दुरुपयोग अनुसन्धान आयोग महेन्द्रनगरका अनुसार गत आर्थिक वर्ष २०७७/७८ मा सुदुरपश्चिमका ९ वटै जिल्लाका विभिन्न स्थानीय तह विरुद्ध ९ सय ७ वटा उजुरीहरू परेकामा चालु आर्थिक वर्षको बैशाख मसान्तसम्म ५ सय ७९ वटा उजुरीहरू दर्ता भएका छन् । यसरी आएका उजुरीहरू विशेषगरि स्थानीय तहसँग सम्बन्धित रहेको कार्यालयले जनाएको छ ।

प्रदेशभरिमा सबैभन्दा बढि भ्रष्टाचारका उजुरीहरू पर्ने जिल्ला कैलाली रहेको छ । गत आर्थिक वर्षमा कैलालीका स्थानीय तह विरूद्ध २ सय ३४ वटा उजुरीहरू दर्ता भएकामा चालु आर्थिक वर्षको हालसम्म एक सय ६८ वटा उजुरीहरू दर्ता भएका छन् । बाजुराका स्थानीय तह विरूद्ध भने सबैभन्दा कम चालु आर्थिक वर्षमा ३५ वटा उजुरीहरू परेका अख्तियार दुरुपयोग अनुसन्धान आयोगको महेन्द्रनगर स्थित कार्यालयका सुचना अधिकारी चन्द्रकान्त बस्नेतले जानकारी दिनुभयो ।

यस्तै चालु आर्थिक वर्षको बैशाखसम्म कञ्चनपुरका स्थानीय तह विरूद्ध एक सय १६, डोटीका स्थानीय तह विरुद्ध ५७, बझाङमा ५१, बैतडी र डडेलधुरामा ४३÷४३, दार्चुलामा ३४, अछाममा ३२ वटा उजुरीहरू दर्ता भएका छन् । स्थानीय सरकारले गर्ने विकासको वितरण समान नभएको तथा योजना छनोटका क्रममा भ्रष्टाचार गरेको भन्दै उजुरी गर्ने क्रम बढेको हो । देश सङ्घीयता गएपछि भ्रष्टाचार घट्ने अपेक्षा गरिए पनि सुदुरपश्चिमसहित देशैभरिका स्थानीय तह विरूद्ध भ्रष्टाचार सम्बन्धि उजुरी बढिरहेको छ ।