शहिद लखन सहित गोरखाका ८ वटा स्थानीय तहमा अस्पताल बन्ने, आज शिलान्यास हुदै

इच्छाकामना न्युज

१५, मंसिर २०७७

शहिद लखन सहित गोरखाका ८ वटा स्थानीय तहमा अस्पताल बन्ने, आज शिलान्यास हुदै

गोरखा १५, मंसिर । गोरखा शहिद लखन गाउँपालिका सहित जिल्लाको ८ स्थानिय तहमा बन्ने अस्पताल आज शिलान्यास हुदै छ ।
जिल्लाको शहिदलखन, अजिरकोट, चुमनुब्री, धार्चे, भीमसेन थापा, आरुघाट, सिरानचोक र बारपाक सुलिकोट गाउँपालिकामा अस्पताल आज शिलान्यास हुन लागेको हो ।
सरकारले अस्पताल निर्माणका लागि आर्थिक स्रोत र जग्गासमेत सुनिश्चित गरिसकेको छ । यी सबै अस्पताल २ वर्षभित्र बनाइसक्ने सरकारको लक्ष्य छ ।
सबै नागरिकलाई आधारभूत स्वास्थ्य सेवा पुर्याउने लक्ष्यसहित सरकारले अस्पताल नभएका पालिकामा आज एकैदिनमा अस्पताल निर्माणको शिलान्यास गर्न लागेको छ । ५, १० र १५ शैय्याको आधारभूत अस्पताल २ वर्षभित्र निर्माण सम्पन्न गर्ने गरी बहुवर्षीय ठेक्का प्रक्रिया अघि बढाउन अर्थ मन्त्रालयले सहमति दिने निर्णय गरिसकेको छ ।
यसरी कायम हुने रकम स्वास्थ्य तथा जनसंख्या मन्त्रालयको वार्षिक बजेटमा समावेश गरी पालिकामा सशर्त अनुदानका रूपमा उपलब्ध गराइनेछ । चालु आर्थिक वर्षको नीति तथा कार्यक्रममा सबै पालिकामा ५ देखि १५ शैय्यासम्मका आधारभूत अस्पताल स्थापना गर्ने उल्लेख छ ।
आज देश भरको ३९६ स्थानिय तहमा निर्माण हुन लागेको अस्पतालको एकै पटकमा शिलान्यास गर्ने तयारी अन्तिम चरणमा पुगेको स्वास्थ्य मन्त्रालयले जनाएको छ ।