बागमति प्रदेश सरकारको लगानीमा मझिमटारको शंखादेवी माविमा छात्रावास सहितको नयाँ भवन बन्ने

इच्छाकामना न्युज

१९, कार्तिक २०७७

बागमति प्रदेश सरकारको लगानीमा मझिमटारको शंखादेवी माविमा छात्रावास सहितको नयाँ भवन बन्ने

धादिङ, १९ कार्तिक । धादिङ स्थित बेनिघाट रोराङ गाउँपालिका ९ मझिमटारमा रहेको शंखादेवी माविमा छात्रावास सहितको नयाँ भवन निर्माण हुने भएको छ। बागमति प्रदेशको सामाजिक विकास मन्त्रालयले प्रदेश भित्र बनाउन लागेको ५ वटा आवसिय विद्यालय भित्र मझिमटारको शंखादेवी मावि पनि परेपछि उक्त विद्यालयमा छात्रावास सहितको नयाँ भवन निर्माण हुने भएको हो।
भवन निर्माणको लागि बागमति प्रदेशको सामाजिक विकास मन्त्रालयले पौने २ करोड बजेट अनुदानमा उपलब्ध गराउने भएको छ।
यस्तै विद्यालयले नयाँ भवन निर्माणका लागि अनुदान पाउने भएपछि मंगलबार एक कार्यक्रमको आयोजना गरि स्थानीय सरकार, विद्यालय व्यवस्थापन समिति, शिक्षक अभिभावक संघ, शिक्षक, स्थानीय शिक्षाप्रेमीहरु तथा राजनैतिक पार्टी प्रतिनिधिहरुसँग छलफल गरेको छ।

विद्यालय व्यवस्थापन समितिका अध्यक्ष एवं वडा नं.९ का अध्यष सुरेश मल्लको अध्यक्षता रहेको कार्यक्रममा बेनिघाट रोराङ गाउँपालिकाका उपाध्यक्ष देवी प्रसाद सिलवालको प्रमुख आतिथ्यता तथा प्रमुख प्रशासकीय अधिकृत लक्ष्मण भट्टराईको विशेष आतिथ्यता रहेको थियो ।

चेपाङ समुदायका विद्यार्थीहरुको बाहुल्यता रहेको उक्त विद्यालयको आफ्नै २१ रोपनी जग्गा रहेको र सोही जग्गामा छात्र छात्राका लागि छुट्टा छुट्टै सुविधा सम्पन्न आवासीय भवन निर्माणका लागि डिपिआर तयार भैसकेको विद्यायका शिक्षक तिलक चेपाङले जानकारी दिनुभयो ।