रुपन्देहीको केरवानी माध्यमिक विद्यालयमा शिक्षिकाको कुटपिटबाट विद्यार्थी घाईते

इच्छाकामना न्युज

१४, चैत्र २०७७

रुपन्देहीको केरवानी माध्यमिक विद्यालयमा शिक्षिकाको कुटपिटबाट विद्यार्थी घाईते

पार्वती न्यौपाने, रुपन्देही, १४ चैत । देवदह ५ मा रहेको केरवानी माध्यमिक विद्यालयमा शिक्षिकाको कुटपिटका कारण विद्यार्थी घाईते भएका छन् । कक्षा कोठामा सोधिएको प्रश्नको जवाफ दिन नसकेको भन्दै शिक्षिका साहारा दाहालले कक्षा ७ मा अध्ययनरत विद्यार्थीलाई कुटपिट गर्नुभएको हो ।

कुटपिटबाट विद्यार्थीको हात सुनिनुको साथै निलडाम समेत रहेको छ । विद्यार्थीहरुको औलामा गहिरो चोट लागेको छ । अहिलेको कानुनमा विद्यार्थीलाई कुटपिट गर्न नपाईने भएपनि शिक्षिका दहालले विद्यार्थीलाई पढाईको नाममा कुटपिट गर्नुभएको छ । शिक्षिका दहालले बेला बेलामा आफुहरुलाई कुटपिट गर्ने गरेको विद्यार्थीले बताएका छन् ।

कुटपिट गर्ने शिक्षिकालाई हटाउनु पर्ने, विद्यालयमा अध्ययन गर्ने वातावरण तयार गर्नुपर्ने माग गर्दे विद्यार्थीहरुले आन्दोलन गरेका थिए । विद्यालयमा बेला बेलामा यस्तो घटना भए पनि विद्यालय प्रशासनले वेवास्ता गर्ने गरेको विद्यार्थीहरुको आरोप छ । शिक्षिका दाहालले आफुले गल्ती गरेको स्वीकार गर्नु भएको छ ।

विद्यार्थीलाई कुटपिट गर्नु गलत भएको विद्यालयका सहायक प्रधानाध्यापक हरीप्रसाद पाण्डेले बताउनुभयो । कुटपिटका विषयमा शिक्षिका दाहाललाई लिखित रुपमा स्पष्टीकरण माग गरेको र सोही स्पष्टिकरण विद्यालय व्यवस्थापन समितिको बैठकमा राख्ने सहायक प्रधानाध्यापक पाण्डेले बताउनु भयो ।