धादिङको बेनीघाट रोराङ–५ पूर्ण खोप वडा घोषणा, दिगोपनामा जोड

इच्छाकामना न्युज

२८, बैशाख २०८३

धादिङको बेनीघाट रोराङ–५ पूर्ण खोप वडा घोषणा, दिगोपनामा जोड

धादिङ । बेनीघाट रोराङ गाउँपालिका वडा नं ५ लाई पूर्ण खोप सुनिश्चित वडा घोषणा गरिएको छ। “स्थानीय स्रोतको उपयोग, स्वामित्व र सहभागिता : पूर्ण खोप सुनिश्चितता हाम्रो प्रतिबद्धता” भन्ने मूल नारासहित आइतबार आयोजित कार्यक्रममा वडालाई पूर्ण खोपयुक्त घोषणा गर्दै यसको दिगोपना सुनिश्चिततामा जोड दिइएको हो।

कार्यक्रम वडा अध्यक्ष रोशन कुमार सिलवालको अध्यक्षतामा सम्पन्न भएको थियो। सिलवाल बेनीघाट आधारभूत अस्पताल सञ्चालन तथा व्यवस्थापन समितिका अध्यक्ष तथा खोप समन्वय समिति संयोजक समेत हुन्।

कार्यक्रममा वडा खोप समन्वय समितिका पदाधिकारी, स्वास्थ्य संस्था सञ्चालन तथा व्यवस्थापन समितिका प्रतिनिधि, महिला सामुदायिक स्वास्थ्य स्वयंसेविका, पोषण स्वास्थ्य स्वयंसेवक, वडा सदस्य, स्थानीय शिक्षक, बुद्धिजीवी, स्वास्थ्यकर्मी, समाजसेवी तथा स्वास्थ्य आमा समूहका प्रतिनिधिहरूको उल्लेखनीय सहभागिता रहेको थियो।

कार्यक्रममा वक्ताहरूले पूर्ण खोप अभियानलाई प्रभावकारी रूपमा कार्यान्वयन गर्न स्थानीय स्रोत, जनसहभागिता र समुदायको स्वामित्व महत्वपूर्ण हुने बताएका थिए। साथै, बालबालिकालाई समयमै सबै खोप उपलब्ध गराई स्वास्थ्य सुरक्षालाई सुनिश्चित गर्न सबै पक्षको निरन्तर सहकार्य आवश्यक रहेकोमा जोड दिइएको थियो।