गोरखा । राष्ट्रिय स्वतन्त्र पार्टीका जिल्ला नेता मुक्ति पाण्डे पक्राउ परेका छन् । फेक रेस्क्यू देखाएर बीमाको रकम ठगी गरेको आरोपमा उनीसहित ६ जनालाई प्रहरीको केन्द्रीय अनुसन्धान व्यूरो (सिआईबी) ले पक्राउ गरेको हो । एभरेष्ट एक्सपेरियन्स एन्ड असिस्टेन्स प्रालिका संचालक समेत रहेको उनी गोरखाको भीमसेन थापा गाउँपालिकाका हुन् ।

चार्टर फ्लाइटलाई रेस्क्यु (उद्धार) देखाएर बीमाको रकम ठगी गर्ने गरेको खुल्न आएपछि पक्राउ गरिएको सीआईबी प्रमुख एआईजी डा. मनोज केसीले बताए । ‘चार्टर फ्लाइटलाई समेत रेस्क्यु देखाएर बीमाको रकम लिएको देखिन्छ,’ उनले भने, ‘यो रेस्क्यु नभएर फेक रेस्क्यु (नक्कली उद्धार) हो ।’

यसका साथै नियमित फ्लाइटलाई पनि रेस्क्यु गरेको देखाएर रकम दाबी गर्ने गरेको समेत देखिएको छ । त्यसका लागि रेस्क्युको समय तालिका र प्यासेन्जर समेत नक्कली तयार पारिएको भेटिएको एआईजी केसीले बताए । पदयात्रा सकिएपछि सोही रुट हुँदै फर्कने पर्यटकलाई सहजै कन्भिन्स गरी चार्टर फ्लाइटमा काठमाडौं पु¥याउने गरेको भेटिएको छ । पक्राउ परेका ६ जना तीन कम्पनीमा आबद्ध व्यक्तिहरू हुन् । यी तीन कम्पनीबाट मात्रै ३१७ जनाको नक्कली उद्धार गरेको भेटिएको छ ।

पाण्डे संचालक रहेको एभरेष्टले २०२२ देखि २०२५ सम्म ६०१ जनाको उद्धार गरेको थियो । जसमध्ये ७१ जना पर्यटकको नक्कली उद्धार गरेको र त्यसवापत ११ लाख ५३ हजार ९१९ डलर बुझेको सीआईबीको भनाइ छ । उनीहरूमाथि संगठित अपराधदेखि किर्ते, राज्यविरुद्धको कसुरलगायतमा अनुसन्धान अघि बढाइएको बताइएको छ ।