पार्टी छोडेको घोषणापछि भावुक बनिन् सुमना, भनिन् – जेनजी पुस्तालाई सहयोग गर्न पार्टी छोडेको हुँ

इच्छाकामना न्युज

२९, भाद्र २०८२

पार्टी छोडेको घोषणापछि भावुक बनिन् सुमना, भनिन् – जेनजी पुस्तालाई सहयोग गर्न पार्टी छोडेको हुँ

काठमाडौँ / पूर्वशिक्षा मन्त्री सुमना श्रेष्ठले आफूले राष्ट्रिय स्वतन्त्र पार्टी छाडेपनि परिवर्तनको एजेन्डा नछाडेको बताएकी छन् । आइतबार विहान समाजिक सञ्जाल फेसबुकमार्फत आफूले राष्ट्रिय स्वतन्त्र पार्टी परित्याग गरेको घोषणा गरेलगत्तै दिउँसो फेरी फेसबुक लाइभमा आएर यस्तो बताएकी हुन् ।

आफ्ना शुभचिन्तकहरूले आफूलाई दिएको साथ सहयोगका लागि धन्यवाद दिंदै उनले भनिन, “मलाई धेरै जनाले आज किन पार्टी छाडेको ? यस्तो गर्नु हुँदैन थियो भनिरहेका छन् । मैँले आजसम्म उक्त पार्टी भित्र रहेर जति काम गर्न सकेँ त्यो तपाईहरू सबैको साथले भएको हो । मैले पार्टी छाडेको हुँ तर, पार्टीभित्र मैंले जुन एजेन्डा बोकेर गएकी थिएँ, त्यो एजेन्डा त कहिल्यै छाडेको छैन ।”

परिवर्तनको एजेन्डा बोकेका जेनजी युवापुस्तालाई सबैले साथ दिनुपर्ने उनको जोड छ । यतिबेला जेनजी पुस्तालाई बदनाम गर्नेहरू अग्रसर भएको बताउँदै उनले त्यस्तो नगर्न र उनीहरूलाई सबैले साथ दिनुपर्ने बताएकी छन् । आफुले पार्टी भित्र गर्न नसकेको काम अब, बाहिर आएर गर्न लागेको उनको दाबी छ ।

आफूले मन्त्री पद्मा जानका लागि पार्टी छाडेको नभइ जेनजी पुस्ताका भाइबहिनीलाई साथ दिनका लागि पार्टी छाडेको दाबी उनले गरेकी छन् ।

भिडियोको अन्त्यमा भावुक हुँदै उनले भनेकी छन, “हामी सबैले चाहेको परिवर्तन हो । कुनै पार्टीभित्र बसेर जेनजीको क्रान्तिलाई बिथोल्न हुँदैन । कुनै दल नसोच्नुस् यतिबेला सबैले नेपाल बनाउन लाग्नुस ।”