आँबुखैरेनीमा पनि ११ औं अन्तर्राष्ट्रिय योग दिवस मनाईयो

इच्छाकामना न्युज

७, आषाढ २०८२

आँबुखैरेनीमा पनि ११ औं अन्तर्राष्ट्रिय योग दिवस मनाईयो

आँबुखैरेनी, असार ७ । तनहुँको आँबुखैरेनीमा ११ औं अन्तर्राष्ट्रिय योग दिवस शनिबार भव्यताका साथ मनाईएको छ। "स्वयं र समाजका लागि योग" भन्ने मूल नारासहित आयोजित कार्यक्रममा योग, प्राणायाम तथा ध्यानका विविध विधिहरू प्रदर्शन गरिएका थिए।

कार्यक्रम पतञ्जली योग समिति र आँबुखैरेनी योग तथा खुसी समाजको आयोजना तथा आँबुखैरेनी गाउँपालिकाको सहयोगमा वडा नं. ३ स्थित फुटसल मैदानमा सम्पन्न भएको हो। कार्यक्रमका प्रमुख अतिथि गाउँपालिका अध्यक्ष शुक्र चुमानले योग मानिसको आत्मिक, मानसिक र शारीरिक सन्तुलनको लागि आवश्यक रहेको बताए। “यस्ता स्वास्थ्यमुखी कार्यक्रमले समाजलाई अनुशासित र सचेत बनाउँछ,” उहाँले भन्नुभयो। गाउँपालिकाले यस्ता कार्यक्रमलाई निरन्तरता दिने प्रतिबद्धता समेत उहाँले व्यक्त गर्नुभयो।

समाजकी अध्यक्ष पम्फा श्रेष्ठले योग अभ्यासले व्यक्ति र समाज दुवैमा सकारात्मक परिवर्तन ल्याउने बताउनुभयो। उहाँका अनुसार योग शारीरिक स्वास्थ्यसँगै मानसिक सन्तुलनका लागि पनि आवश्यक छ। कार्यक्रममा वडा नं. ४ का अध्यक्ष मिलन भुजेल, बौद्ध सदन आँबुखैरेनी गुम्बाका अध्यक्ष कृष्णमान तामाङ, विभिन्न योग साधक-साधिका र समाजसेवीहरूको उपस्थिति रहेको थियो।

कार्यक्रमको सञ्चालन समाजकी सचिव कुमारी गुरुङले गर्नुभएको थियो भने उपाध्यक्ष गौरी माया प्रधानले स्वागत मन्तव्य दिनुभएको थियो। योग दिवसको अवसरमा सूर्य नमस्कार, प्राणायाम, ध्यान विधि तथा अन्य योग आसनहरू प्रस्तुत गरिएको थियो । सहभागीहरूले योग अभ्यासमा उत्साहपूर्वक सहभागिता जनाएका थिए।