गोरखा । आगलागीबाट क्षति भएको शहिद लखन गाउँपालिका–७ स्थित बुंकोट स्वास्थ्य चौकिलाई स्वास्थ्य सामग्री वितरण गरिएको छ । अक्सिजन कन्सन्टेटर पाँच थान, एक हजार पिस प्यारासिटामोल, आठ हजार पिस सर्जिकल मास्क, १५ सय पिस ग्लोब्स, ५ पिस थर्ममिटर, ५ पिस पल्स अक्सिमिटर, दुई हजार पिस एननाइटी फाइब मास्क लगायतका सामग्री वितरण गरिएको वडाध्यक्ष शरण श्रेष्ठले बताए ।

त्यस्तै चार थान डस्बिन, दुई थान स्टेचर, दुई थान खानेपानी फिल्टर लगायतका सामग्री पनि हस्तान्तरण गरिएको उनले जानकारी दिए । गोरखा क्षेत्र नं १ का प्रतिनिधिसभा सदस्य राजेन्द्र बजगाईको विशेष पहलमा स्वास्थ्य विभागबाट प्राप्त उक्त सामग्री बिहीवार एक कार्यक्रमका बिच स्वास्थ्य चौकी प्रमुख बिमला पुलामीलाई हस्तान्तरण गरिएको हो । आगलागीबाट क्षति पुगेको स्वास्थ्य चौकीमा उक्त सामग्रीले धेरै नै सहयोग पुग्ने अपेक्षा गरिएको छ ।

चौकीमा आगलागी भएपनि सेवा प्रवाह भने नरोकिएको बुकोट स्वास्थ्य चौकीकी प्रमुख पुलामीले बताइन् । ‘स्वास्थ्य चौकीबाट दिनुपर्ने सेवाहरु सबै नियमित नै छ, केही पनि अवरोध छैन’, उनले भनिन्, ‘आवश्यक सामग्रीहरु जुटाउदै छौ ।’
माथिल्लो तल्लामा रहेको प्रशासन, स्टोर रुम र हलका सामग्री भुइ कोठामा सार्नुपर्दा केहि साघँुरो भएको उनले जानकारी दिइन् ।

स्वास्थ्य सामग्री हस्तान्तरण कार्यक्रममा प्रमुख जिल्ला अधिकारी दिनेश सागर भुसाल, सहिद लखन गाउँपालिका प्रमुख रमेश बाबु थापा, उपप्रमुख इन्दिरा तिवारी, वडा नं ७ का वडा अध्यक्ष श्रेष्ठ, नेपाली कांग्रेस जिल्ला कार्यबाहक सभापती इमानसिंह बस्नेत, जिल्ला सचिव कृष्ण आले, वडाका जनप्रतिनिधि स्थानीय लगायतको उपस्थिति रहेको थियो ।

यही जेठ ७ गते विद्युत सर्ट भई स्वास्थ्यचौकीमा आगलागी भएको थियो ।

आगलागीबाट स्वास्थ्य चौकी भवनका दोस्रो तल्लाको स्टोर कक्षमा रहेको स्वास्थ्य सामग्री, उपकरण र कागजपत्र सबै जलेर पुर्णरुपमा नष्ट भएका थिए ।