चितवन । चितवनको माडी १ स्थित परशुराम कुण्डमा मंगलबारदेखि स्नान सुरु भएको छ। विशेषगरी चैते दशैं एवं रामनवमीका अवसरमा स्नान गरिने धार्मिक एवं पुरातात्विक महत्त्व बोकेको परशुराम कुण्डमा औंसीदेखि स्नान सुरु हुने गर्छ। कुण्डमा स्नान मेला लाग्ने हुँदा स्थानीय गोद्धक क्षेत्र विकास समितिले मंगलबार बाटोमा सरसफाइसमेत गरेको छ। 

संस्थाका अध्यक्ष तुलसिंङ गुरुङका अनुसार कुण्डसम्म जान खोला एवं चारकोसे झाडी पार गर्नुपर्ने भएकाले श्रद्धालु भक्तजनलाई सहजरुपमा जान आउन मिल्ने गरी झाडी पन्छाएर सरसफाइ गरिनुका साथै गारेटो बाटो मर्मत गरिएको छ। सरसफाइमा स्थानीय, वडा सञ्जाल, टोलविकास, समूह एवं युवा क्लबहरुले सहयोग गरेका थिए। 

विगत २ वर्षदेखि कोभिडको प्रभावका कारण कुण्डसम्म आउजाउमा रोक लगाइएको थियो। जसले गर्दा गोरेटा बाटोसमेत भत्किएको थियो। केही वर्ष प्रयोगविहीन हुँदा जीर्ण बनेको बाटो मर्मत गरेर हिँडडुलमा सहज बनाइएको उनले बताए। 

चैत १३ देखि यज्ञ हुँदै

गोद्धकमा यही चैत्र १३ गतेदेखि १७ गतेसम्म भव्य गोद्धक राम चरित्रकथा यज्ञसमेत हुँदैछ। प्रखरवाचक व्यासआचार्य गुरु चैतन्यकृष्णको मुखारविन्दबाट संगीतमय राम कथा वाचन हुने यज्ञ सम्पादन समितिका संयोजक भरत तिमिल्सेनाले जानकारी दिए। मेलामा विभिन्न स्टलसहित हरेक दिन सांस्कृतिक कार्यक्रम, ठेलो, भलिबललगायत प्रतियोगितात्मक खेलकुदसमेत आयोजना गरिएको उनले बताए।

प्राचीन किंवदन्तीअनुसार यहाँ परशुरामले तपस्या गरेका थिए। परशुराम ऋषिले आफ्नै आमाको हत्या गरेर पाप मोक्ष (पाप पखाल्न) गर्न गोद्धक क्षेत्रमा रहेको देउता खोलाको सिरानको कुण्ड (परशुराम कुण्ड) मा पुगी स्नान गरेकोे धार्मिक विश्वास छ।

ठूलो धार्मिक महत्त्व बोकेको गोद्धक क्षेत्रमा चैत्र रामनवमीमा नेपाल र भारतका लाखौँ भक्तजनहरु उपस्थित भई परशुराम कुण्डमा स्नान गरी गोद्धक क्षेत्रको मेला भर्ने परापूर्वकालदेखिको इतिहास छ। परशुराम कुण्ड बस्तीदेखि करिब ४ किलोमिटर जंगलभित्र चितवन राष्ट्रिय निकुञ्जमा पर्छ।