लक्ष्यअनुसार राजस्व नउठेपछि रेनु दाहाल तनाबमा

इच्छाकामना न्युज

१९, माघ २०७९

लक्ष्यअनुसार राजस्व नउठेपछि रेनु दाहाल तनाबमा

चितवन । आर्थिक वर्ष ०७९/०८० को ६ महिना गइसक्दा पनि लक्ष्यअनुसारको कर संकलन गर्न नसकेपछि भरतपुर महानगरपालिकाकी मेयर रेनु दाहाल तनाबमा छिन्। चालू आर्थिक वर्षको लागि रु १ अर्ब ५० करोड राजस्व संकलन गर्ने लक्ष्य लिइए पनि आर्थिक वर्षको ६ महिना वितिसक्दा लक्ष्यको जम्मा २७ प्रतिशत मात्रै राजस्व संकलन भएपछि मेयर दाहाल तनाबमा परेकी हुन्।

बिहीबार महानगरपालिकामा भएको कर अभियानको उद्घाटनका क्रममा मेयर दाहालले राजस्व संकलनमा देखिएको कमिप्रति निकै चिन्ता व्यक्त गरिन्। महानगरपालिका हुनलाई न्युनतम रु १ अर्ब आन्तरिक आम्दान हुनुपर्ने कानुनी प्रवधान छ। महानगरपालिको आन्तरिक आम्दानी हेर्दा भरतपुरको विकास निर्माणका लागि केन्द्र र प्रदेश सरकारको भर पर्नुपर्ने अवस्था छ।

राजस्व संकलनको अवस्था हेर्दा न्युनतम रु १ अर्ब संकलन हुन सक्ने लक्षण नदेखिएको मेयर दाहालले बताइन्। निराश हुँदै उनले भनिन्, 'भरतपुरको राजस्व संकलनको अवस्था निकै टिठ लाग्दो छ।' करको दायरा फराकिलो पार्दै अभियानलाई तीव्ररुपमा अगाडि बढाउन राजस्व महाशाखालाई निर्देशनसमेत दिइन्।

भरतपुरको सबैभन्दा बढी कर उठ्ने घरवाहाल करलाई थप प्रभावकारी बनाउनु आवश्यक रहेको उनको भनाइ छ। अघिल्लो आर्थिक वर्षमा मालपोत कार्यालय भरतपुरबाट रु ७७ करोड राजस्व संकलन भएको थियो भने चालू आर्थिक वर्षको ६ महिनामा बल्लतल्ल रु ७ करोड रकम संकलन भएको महानगरपालिकाले जनाएको छ।