चितवन । गोरखाको दरौँदी नदीबाट पहिलोपटक बिजुली उत्पादन गरेको कालिका पावर कम्पनी लिमिटेडले आफ्ना शेयर सदस्यलाई १५ प्रतिशत बोनस दिने घोषणा गरेको छ। सञ्चालक समितिको निर्णयअनुसार शुक्रबार नारायणगढमा भएको १५औँ वार्षिक साधारण सभाबाट आफ्ना शेयर सदस्यहरुलाई १५ प्रतिशत बोनस दिने घोषणा गरिएको हो। कम्पनीको आर्थिक वर्ष २०७८/०७९ को संचित मुनाफाबाट हाल कायम चुक्ता पुँजीको १५ प्रतिशतका दरले बोनस शेयर दिने निर्णय भएको कम्पनीका सञ्चालक युवबहादुर क्षेत्रीले जानकारी दिए। कम्पनीको ६९ करोड रूपैयाँ चुक्ता पुँजीको १५ प्रतिशतले हुन आउने १० करोड ३५ लाख बराबरको शेयर बोनस दिने निर्णय गरेको उनले बताए।

कम्पनीका लेखा समिति संयोजक सुरेन्द्र पाण्डेका अनुसार कम्पनीले घोषणा गरेको लाभांश विद्युत नियमन आयोगबाट स्वीकृत गरेपछि शेयरधनीले पाउने छन्। कम्पनीले गत आर्थिक वर्षको संचित मुनाफाबाट हाल कायम भएको चुक्ता पुँजीको ०.७८ प्रतिशतले हुन आउने रकम रू ५४ लाख ४७ हजार ५५० नगद लाभांश कर प्रयोजनका लागि वितरण गर्न स्वीकृत गरेको उनले बताए।

सञ्चालक सदस्य चयन
साधरण सभाले शुक्रबार नै कम्पनीको नयाँ सञ्चालकमा दुई जना सदस्य चयन गरेको छ। आगामी कार्यकालका लागि सर्वसाधरण शेयर सदस्यबाट शेयर सञ्चालक सदस्यमा भूपराज काफ्ले र सीताराम श्रेष्ठलाई चयन गरिएको हो। यस्तै विज्ञतर्फबाट स्वतन्त्र सञ्चालकको रूपमा बलेन्द्र क्षेत्रीलाई सर्वसमतरूपमा चयन गरिएको छ। निर्वाचन संयोजक कृष्णप्रसाद पनेरूका अनुसार यो समितिको कार्यवधि ४ वर्षको रहने छ।

कालिका पावर कम्पनीले पहिलोपटक गोरखाको अजिरकोट र बारपाक–सुलिकोट गाउँपालिकाको बीचमा पर्ने दरौँदी नदीबाट विद्युत उत्पादन गरेको थियो। कम्पनीले यसपछि पनि कम्पनीले ८.३ मेगावाटको माथिल्लो दरौँदी बी साना जलविद्युत आयोजना र ९.८२ मेगावाटको माथिल्लो दरौँदी सी साना जलविद्युत आयोजना खरिद गर्ने विषयमा आवश्यक निर्णय लिन सञ्चालक समितिलाई अख्तियारी दिएको छ।