सुसिला श्रेष्ठ, काठमाडौं । वैदेशिक रोजगारीबाट फर्किकाहरूले विदेशमा आर्जन गरेको पुँजी, ज्ञान, सीप, प्रविधि र अनुभव आफ्नै देशमा प्रयोग गरुन् भन्ने उदेश्य र योजना सरकारको छ । योजना अनुरूप वैदेशिक रोजगारीबाट फर्किएकाहरूलाई देशमै पुनः एकीकरण गर्ने कार्यक्रम पनि सरकारले ल्याएको छ । जसका लागि आवश्यक निर्देशिका जारी भयो । तर, साढे २ महिना भयो, सामान्य छलफल बाहेक कुनै उपलब्धि भएको छैन । रोजगारीको खोजी गर्दै विदेशीने युवाको सङ्ख्या पछिल्लो ६ वर्षमा ७२ लाखभन्दा बढि छ । तर, ती मध्ये कति नेपाल फर्किए भन्ने तथ्याङ्क पनि सरकारसँग छैन । आर्थिक सर्वेक्षणले भने करिब ४४ लाख नेपाली वैदेशिक रोजगारीमा रहेको देखाउँछ । यसरी हेर्दा करिब २८ लाख नेपाली वैदेशिक रोजगारीपछि नेपाल फर्किसकेका हुन सक्छन् । सरकारले वैदेशिक रोजगारीबाट फर्किएकाहरूको सीप, पुँजी र प्रविधिलाई उपयोग गर्दैउनीहरूलाई रोजगारीमा आबद्ध गराउन पुनः एकीकरण कार्यक्रम अवधारणा ल्याएको छ । कार्यक्रमले बजारको माग र व्यक्तिको क्षमता अनुसार रोजगारीको व्यवस्थापनमा सहजीकरणगर्नेछ भने रोजगारीमा आबद्ध गराउन श्रम बजारको आवश्यकतामा आधारित व्यवसायिक र व्यवस्थापकीय सीपमूलक तालिम प्रदान प्रदान गर्नेछ । जसको कार्यान्वयनका लागि सरकारले आवश्यक निर्देशिका पनि जारी गरेको छ । तर, निर्देशिका जारी भएको साढे २ महिनासम्म  कार्यक्रम कसरी गर्ने छलफलमा मात्रै सिमित रहेको छ । निर्देशिकामा भएको व्यवस्थाअनुसार वैदेशिक रोजगारबाट फर्केकालाई समाजमा अन्तरघुलन गराउनका लागि पारिवारिक तथा सामाजिक मेलमिलाप, मनोसामाजिक परामर्श, नेतृत्व विकास, सामाजिक सञ्जाल निर्माण तथा स्वयंसेवक परिचालन जस्ता कार्यक्रम सञ्चालन गरिने छ । तर,पैदेशिक रोजगार बोर्डका अनुसार कार्यक्रम भने दसैँ तिहारपछि मात्रै कार्यान्वयनमा आउने छ ।