खसीबोका बेचेर दसैँ मनाउने किसानको योजना

इच्छाकामना न्युज

१५, आश्विन २०७९

पवित्रा पराजुली, नवलपुर । दसैँ नजिकिएसँगै गाउँदेखि सहरसम्म मासुका लागि खसीबोकाको किनबेच हुने गर्छ । यसवर्ष पनि दसैँका लागि गाउँगाउँबाट खसीबोका खरिद गरी व्यापारीहरुले सहरमा पु¥र्याइरहेका छन् । कालिका नगरपालिका चितवनका आठ सय किसान परिवार खसीबोका बेचेरै दसैँ खर्च चलाउँदै छन् । कालिका ८ का उन बहादुर खतिवडाले १८ वटा बाख्रा पाल्नुभएको छ । दसैँ टार्ने र वर्षभरीको खर्च धान्ने स्रोत भनेकै बाख्रा पालन हो ।

यसपाली ४ वटा खसीबोका बेच्नका लागि ठिक्क भएका छन् । त्यही आम्दानीले जहान परिवारलाई नयाँ कपडा किनिदिने र दसैँ मनाउने योजनामा खतिवडा हुनुहुन्छ । कालिका ८ कै डोरकुमारी बस्नेतको खोरमा पनि ३० वटा स्थानीय जातका खसी बोका बेच्नका लागि ठिक्क छन् । दसैँ नजिकिएसँगै खसी बोका किन्न ग्राहकहरु घरैमा आईपुग्छन् ।

बजारको कुनै समस्या छैन । यसपटक आम्दानी राम्रो हुने उहाँको अपेक्षा छ । दसैँै यसैपनि रमाइलोको पर्व हो । अझै बालबालिका चाडपर्व भनेपछि खुब रमाउँछन् । कालिका नगरपालिका क्षेत्रका अधिकांश परिवारले बाख्रा पालन गरेका छन् । उनीहरुको प्रमूख आम्दानीको स्रोत पनि यही हो । गाउँमा सहकारी आएसँगै किसानले तालिम र अनुदान पाएका छन् ।

कालिका नगरपालिकामा पहाडी भु–भागका अधिकांश किसान कृषि कर्ममा जोडिएका छन् । चाडपर्व होस् वा जीवन गुजारा चलाउन, यहाँका मानिसहरू बाख्रा पालनमा निर्भर छन् ।