कृषि, पशु प्राविधिक

पालिकामा स्नातक उतीर्ण कृषि, पशु प्राविधिक नियुक्त गरिँदै

सिआईएन

५, आश्विन २०७९

पालिकामा स्नातक उतीर्ण कृषि, पशु प्राविधिक नियुक्त गरिँदै

उषा तामाङ, काठमाडाँै । स्थानीय तहमा कृषि तथा पशु विज्ञानमा स्नातक गरेका जनशक्ति नियुक्त गर्ने प्रक्रिया सुरु भएको छ । सरकारले चालु आर्थिक वर्षको नीति तथा कार्यक्रममा स्थानीय तहमा कृषि तथा पशु विज्ञानमा स्नातक गरेका एक एक जना जनशक्ति तथा सबै वडामा कृषि प्राविधिक उपलब्ध गराउने उल्लेख गरेको थियो । सोही अनुसार ३ सय ४६ पालिकामा पशु चिकित्सक र ६ सय २९ पालिकामा कृषिको जनशक्ति राख्ने प्रक्रिया चलिरहेको हो ।

कतिपय स्थानीय तहमा पदपूर्ति भइसकेको र कतिपयमा प्रक्रिया चलिरहेको कृषि तथा पशुपन्छी विकास मन्त्रालयका प्रवक्ता प्रकाश कुमार सन्जेलले जानकारी दिनुभयो । नियुक्त भएका जनशक्तिलाई सङ्घ सरकारले तलब भत्ताको व्यवस्था गरेको छ । ‘एक वडा, एक प्राविधिक’ भने स्थानीय तहले नै आवश्यकताका आधारमा व्यवस्था गर्नुपर्ने मन्त्रालयले जनाएको छ ।

६ वर्षअघि ‘एक गाउँ, एक प्राविधिक’ कार्यक्रम अन्तर्गत नियुक्त गरिएका ३ हजार कृषि तथा पशु प्राविधिक मध्ये हाल करिव २५ सय कार्यरत छन् । उनीहरूलाई सङ्घ सरकारले ५० प्रतिशत रकम अर्थात वार्षिक ४७ करोडको हाराहारीमा स्थानीय तहलाई पठाउने गरेको छ । ५० प्रतिशत थप तलबसहित आवश्यकताका आधारमा कृषि तथा पशु प्राविधिकको व्यवस्था भने पालिका आफैले गर्नुपर्नेछ ।