दिपक खत्री, सिन्धुपाल्चोक । स्वदेशमा नै स्वरोजगार बन्न चाहनेले होस् वा वैदेशिक रोजगारीबाट फर्किएर आएकाहरूको पहिलो रोजाइ हो, तरकारी खेती । व्यावसायिक रूपमा गरिएको तरकारी खेतीबाट राम्रो उत्पादन पनि लिन सकिन्छ । मौसमी, बेमौसमी दुबै किसिमको तरकारी खेती गर्नेहरूले गर्ने आम्दानी अझै राम्रो हुन्छ । सिन्धुपाल्चोकको बलेफी ,सुनकोसि, मेलम्ची क्षेत्रका किसानहरू पनि व्यावसायिक तरकारी खेतीमा आकर्षित भएका छन् ।

बलेफी गाउँपालिको माङ्का, चिम्लिङ टोलका प्रायः सबैले तरकारी खेती गर्ने गरेका छन् । अहिले उनीहरूको बारीमा लहलहाउदो खुर्सानी, गोलभेँडा, घिरौला, बन्दा, करेला, धनियाँ, काँक्रो, सिमी, करेला जस्ता तरकारी छन् । पहिले खुल्ला स्थानमा तरकारी फलाउन नसकेका किसान अहिले टनेलमा खेती गर्छन्, जसबाट आम्दानी पनि राम्रो हुने गरेको छ । तरकारी खेतिबाट राम्रो कमाइ हुने गरेको  बलेफीका रोजन तामाङको भनाइ छ ।

परम्परागत तरिकाले भन्दा नयाँ विधिबाट गरिएको खेतीले किसानलाई फाइदा दिएको छ । किसानले, लागत घटाउन, उत्पादन बढाउन र रोगकीराको समस्याबाट बच्न टनेल भित्र हाइटेक प्रविधि प्रयोग गर्न थालेका छन् । स्थायी संरचनाको प्लास्टिक टनेल बनाएर बिरुवाको जरा–जरामा आवश्यकता अनुसार सिचाइँ हुने थोपा सिचाई प्रविधि पनि उनीहरूले जडान गरेका छन् । हावा र प्रकाश छिर्ने पारदर्शी प्लास्टिकको टनेल बनाइएको छ ।

सुधारिएको गोठ निमार्णले बस्तुभाउको मुत्र पनि सदुपयोग हुने गरेको छ । खानेपानी पहुँच तथा कृषि आय सुधार आयोजनाले मेलम्ची नगरपालिका–९ , सुनकोसी गाउँपालिका–६, बलेफी गाँउपालिका ४ र ६ का २ सय ७७ घरधुरीलाई कृषक समुहमा आवद्ध गराएर प्रविधि सहितको व्यावसायिक तरकारी खेतीमा जोडेको छ । उनिहरूको उत्पादन तरकारी सङ्कलन केन्द्रमा जम्मा हुन्छ । किसानले बजारमा चलेको मुल्य पाउछन् भने तरकारी तरकारी मुख्य बजारमा विक्री हुनेगरेको छ ।

किसान र उत्पादनलाइ थप गूणस्तरिय बनाउन स्थानीय सरकारले लगानी अझै बढाउनुपर्ने कृषि विज्ञ डा. रामचन्द्र भुषालको भनाइ छ । टनेल भित्र हाइटेक प्रविधिको मार्फतबाट तरकारी खेती गरेर सिन्धुपाल्चोकका किसानहरूले राम्रो आम्दानी मात्रै गरिरहेका छैनन् उदाहरणीय पनि बनेका छन् ।