सुसिला श्रेष्ठ, काठमाडौँ । चीनसँगको व्यापारिक कारोबार हुने दुई नाका गत साउनदेखि बन्द हुँदा नेपाली बजार प्रभावित भएको छ । लत्ताकपडा, जुत्ताचप्पल र सजावटका सामग्री, फलफूल लगायत तरकारीका लागि मूख्य चाडपर्वमा चिनियाँ बजारकै भर पर्ने नेपाली बजार, नाका बन्द हुँदा प्रभावित भएको छ ।

नाका बन्द भएर सामान नआउँदा नेपालको बजार मूल्य बढिरहेको छ तर, तत्कालै चिनियाँ नाका खुल्ने सम्भावना छैन । नेपाली बजारको २० प्रतिशतभन्दा बढी हिस्सा चीनको सामग्रीले ओगटेको छ । तर कोरोनापछि नै चीनबाट सामग्री आयात घटेको छ भने झण्डै एक महिनादेखि नाका बन्द जस्तै छ ।

चीनबाट तयारी कपडा र जुत्ताचप्पलसँगै विद्युतीय सामान धेरै आयात हुने गरेको छ । नाका बन्द हुँदा व्यापारी र उपभोक्ता दुबै महङ्गोमा कारोबार गर्न बाध्य छन् ।

नेपाल र चीन बिचका ६ वटा नाका भए पनि दुई वटा नाकाबाट मात्रै व्यापारिक कारोबार हुने गरेको छ । तर सिन्धुपाल्चोकको तातोपानी र रसुवागढी नाका बन्द हँुदा दैनिक १ करोड राजश्व समेत गुमेको तातोपानी भन्सार कार्यालयका प्रमुख नारद गौतमले बताउनुभयो ।

कोरोना अघि दैनिक २ सयदेखि साढे २ सय कन्टेनरमा सामान आयात हुने यी नाकाबाट अहिले मुस्किलले ३० वटा मात्रै भित्रने गरेको छ ।

सरकारले चीनसँगको नाका खुलाइ द्धिपक्षिय व्यापार खुलाउन पहल भइरहेको गृह मन्त्रालयका प्रवक्ता फणिन्द्रमणी पोखरेलले बताउनुभयो ।

गत आर्थिक वर्ष नेपालले चीनबाट साढे २ खर्बभन्दा बढीको सामान आयात गरेको थियो भने ८० करोडभन्दा बढीको सामान निर्यात गरेको थियो । तर अहिले नाका बन्द भएपछि निर्यात पनि शुन्य रहेको छ ।