काठमाण्डौं, ७ पौष
 कतार सरकारले भोलि (२३ डिसेम्बर) देखि निःशुल्क रुपमा खोप लगाउने अभियान सुरु गर्ने भएको छ। ।
कतारमा पहिलो पटक फाइजर र बायो एनटेक कम्पनीको भ्याक्सिन सोमबार राती हमाद इन्टरनेशनल विमानस्थलमा आइपुगे सँगै खोप लगाउने तयारी गरेको दोहा न्युजले जनाएको छ ।
पहिलो चरणमा निःशुल्क रुपमा वृद्धवृद्धा र फ्रन्टलाइनमा काम गर्नेलाई खोप लगाउने कतारको स्वास्थ्य मन्त्रालयले जनाएको छ । 
७० वर्ष नाघेका दीर्घरोगी  र स्वास्थ्य क्षेत्रमा काम गर्ने मुख्य कर्मचारीहरु जसले कोरोना सङ्क्रमितको नजिक भएर काम गरेका छन् उनीहरुलाई प्राथमिकतामा राखेको छ । छनोटमा परेका व्यक्तिहरुलाई फोन र एसएमएसमार्फत जानकारी दिएर खोप लगाउन बोलाउने कतारले जनाएको छ । 
कतारले २०२१ भित्रमा आफ्नो देशमा रहेका सबैलाई कोरोना भाइरस विरुद्धको खोप लगाउने रणनीति अनुसार अघि बढे पनि अहिले सीमित सङ्ख्यामा भ्याक्सिन आएकाले प्राथमिकताको आधारमा दिइने जनाएको छ । 
यो कम्पनीको भ्याक्सिन अमेरिका, बेलायत, क्यानडाजस्ता देशले प्रयोगमा ल्याइसकेका छन् । जसले यो खोप लगाएका छन् उनीहरुमा एकदमै कम मात्रमा साइड इफेक्ट भेटिएको छ । 
कोरोना महामारी संसारभरीका देशमा फैलिएको छ । बेलायतमा नयाँ खालको सङ्क्रमण देखिने थालेको छ । तर पछिल्लो समय कतारमा भने केही स्थिर देखिएको छ । दिनमा लगभग १५० नयाँ सङ्क्रमित भेटिएको छ । तर पनि कोरोना सङ्क्रमण फैलने क्रम नरोकिएको र खोप आए पनि सचेत रहन कतार सरकारले आग्रह गरेको छ ।

कतारमा झण्डै चार लाख नेपाली कार्यरत छन् । कतारमा सङ्क्रमितमध्ये धेरैजसो आप्रवासी श्रमिक रहेका छन् । कतार सरकारले खोप ल्याएसँगै अब कतारमा रहेका नेपालीले पनि चरणबद्ध रुपमा खोप लगाउन पाउनेछन् ।
कतार सरकारले त्यहाँ बस्ने हरेक व्यक्तिले निःशुल्क रुपमा कोरोना विरुद्धको खोप लगाउन पाउने यसअघि नै बताएको छ ।