भरतपुर । नेपाल तमू विद्यार्थी छोँज धीँ चितवनले रोयल राइनो राइडर्स एमसी चितवनसँगको सहकार्यमा शनिबार वृक्षारोपण गरेको छ । अन्तर्राष्ट्रिय मित्रता दिवसको अवसरमा शनिबार महाबौद्ध गुम्बा परिषरमा वृक्षारोपण गरेको हो । जंगलमा भएका बिरूवाको संरक्षण नहुँदा जमिन खाली हुँदै गएपछि गुम्बा परिसरमा वृक्षारोपण गरिएको छोँज धीँ चितवनका अध्यक्ष सुमित गुरूङले जानकारी दिए । 

धार्मिक वनअन्तर्गत पर्ने महाबौद्ध गुम्बा परिषरमा बाँकी रहेका रूखहरू समेत ढलेर मासिँदै गएपछि त्यसलाई पूर्ति गराउनको लागि विद्यार्थीले विभिन्न जातका बिरूवा रोपेर हरियाली फर्काउने प्रयास गरिएको उनले बताए । 

छोँज धीँसँग सहकार्य गरेको रोयल राइनो राइडर्स एमसीका अध्यक्ष विनोद लामाले पनि विद्यार्थीसँग सहकार्य गरेर हरियाली अभियानामा सहभागी हुन पाएको भन्दै खुसी व्यक्त गरे । सामाजिक क्षेत्रमा काम गर्नको लागि आगामी दिनमा पनि सहकार्य गर्दै जाने उनले बताए । 

बौद्ध धर्म सेवा समिति चितवनकी अध्यक्ष विमला गुरूङले जुनसुकै काम गरे पनि त्यसबाट प्रतिफल आउने गरी काम गर्नुपर्ने सुझाव दिइन् । एक पटक बिरूवा लगाउँदैमा काम पूरा नहुने भन्दै यसको संरक्षणमा पनि चासो देखाउनुपर्ने बताइन् । तमू नगर गुठी भरतपुरका पूर्वअध्यक्ष रामकृष्ण गुरूङले भने ‘हरियो वन नेपालको धन’ भन्ने भनाइ कुनै दिन दन्त्य कथा बन्न सक्ने हुँदा वन र वातावरणप्रति सबैले चासो देखाउनुपर्ने सुझाव दिए । 

कार्यक्रमको औपचारिक खण्डमा तमू नगर गुठी भरतपुरका अध्यक्ष पूर्णबहादुर गुरूङ, नेपाल तमू विद्यार्थी छोँज धीँका केन्द्रीय उपाध्यक्ष विमश गुरूङ, तमू ह्युल छोँज धीँकी केन्द्रीय समितिका सल्लाहकार शारदा गुरूङलगायतले बोलेका थिए ।