कोशिटप्पु वन्यजन्तु आरक्षमा हात्तीका छावा जोगाउन चौबिसै घण्टा निगरानी

इच्छाकामना न्युज

१४, श्रावण २०७९

कोशिटप्पु वन्यजन्तु आरक्षमा हात्तीका छावा जोगाउन चौबिसै घण्टा निगरानी

अमर खड्का, सुनसरी । कोशी टप्पु वन्य जन्तु आरक्षमा रहेका हात्तीमध्ये लक्ष्मीकलीले छावा जन्माएसँगै संरक्षणकर्मीहरूमा खुसियाली छाएको छ । सुत्केरी हात्तीको स्याहार गर्न र छावा जोगाउँन कर्मचारी अहोरात्र खटिएका छन् । कोशी टप्पु वन्य जन्तु आरक्षमा रहेका हात्तीमध्ये १४ वर्षीया लक्ष्मीकलीले जन्माएको पोथी छावाको स्याहारमा १९ जना कर्मचारी १ महिनादेखि खटिएका छन् ।

सुत्केरी हात्तीलाई खानपानमा पुरै ध्यान दिने गरेको कोशी टप्पु वन्यजन्तु हात्तीसार विभाग अधिकृत रामगुलाम चौधरीले बताउनुभयो । लक्ष्मीकलीले यसअघि २०७७ जेठ अन्तिम साता जन्माएको छावा भने साढे आठ घण्टा मात्रै बाँचेको थियो ।

यसपाली लक्ष्मीकलीले जन्माएको छावा पूरा समय अवधिमा जन्मिएकाले गर्दा पनि कुनै समस्या नआउने आरक्ष प्रशासनले जनाएको छ। लक्ष्मीकलीले गत असोज २७ गते मृत्यु भएको रैथाने जङ्गली मकुना हात्तीको संसर्गमा छावा जन्माएको हो ।

मकुना हात्ति करेन्ट लागेर मरेको थियो । शोभाकली नामक हात्तीले पनि भाले ‘छावा’ जन्माएको थियो । तर, २२ दिनमै मरेका कारण छावा बचाउन चुनौतीपूर्ण छ । कोशी टप्पु वन्यजन्तु आरक्षमा यतिबेला दमदमकली नामक हात्तीले पोथी छावा जन्माएको तीन वर्ष पुगेको छ। जसको नाम कुसाहाकली राखिएको छ।सरस्वती कलीको भोले छावा जन्मिएको पनि तीन वर्ष नै पुगेको छ ।

हात्तीले १८ महिनादेखि २२ महिनामा बच्चा जन्माउने गर्छ । तर, बच्चा जन्माएपछि दुर्लभै मात्रमा बाँच्ने गरेका छन् । कोशी टप्पुमा यतिबेला बच्चासहित नौवटा हात्ती छन् ।