माधव बेल्वासे, कपिलबस्तु । सरकारले भारतसँग जोडिएका नाकामा होल्डिङ सेन्टर निर्माण गरे पनि सञ्चालनमा आउन सकेको छैन । भारत वाट नेपाल भित्रिएका नेपालीहरूलाई प्रवेश विन्दुमै होल्डिङ सेन्टरमा राखेर पिसिआर र एन्टिजेट परीक्षणको लागि तथा सङ्क्रमितहरू सुरक्षित राख्नको लागि १ हजार अट्ने होल्डिङ सेन्टर निर्माण भएका छन् । २०७८ वैशाख ५ गतेको मन्त्रिपरिषद्को बैठकले ८ वटा नाकामा होल्डिङ सेन्टर निर्माण गर्ने निर्णय गरेको थियो ।

झापाको काकरभिट्टा, मोरङको रानी,पर्साको वीरगन्ज,रुपन्देहीको बेलहिया,कपिलवस्तुको कृष्णनगर,वाकेको जमुना,कैलालीको गैरिफन्टा र कन्चनपुरको गड्डाचौकीमा निर्माण भएका छन् । कृष्णनगरमा होल्डिङ सेन्टर बनाउने जिम्मा पाएको नेपाली सेनाले २७ करोड ६७ लाखको लागतमा होल्डिङ सेन्टर निर्माण गरिएको हो ।

होल्डिङ सेन्टर निर्माणको काम पुरा भए पनि कसले सञ्चालन गर्ने भन्ने स्पष्ट नहुँदा सञ्चालनमा आउन सकेको छैन । निर्माणको काम सम्पन्न भएको ६ महिना बिते पनि सञ्चालन नहुँदा सीमा नाका नजिकै एक छाप्रोमा स्वास्थ्य जाँच भइरहेको छ । कृष्णनगरमा छाप्रो नजिकै ६ सय बेडको होल्डिङ सेन्टर छ भने सीमा देखि १ किलोमिटरको दुरीमा शिवानगरमा ४ सय बेडको होल्डिङ सेन्टर छ ।

होल्डिङ सेन्टर सञ्चालनको लागि केन्द्रले परिपत्र नगरेको प्रमुख जिल्ला अधिकारी धर्मेन्द्र कुमार कुमार मिश्रले बताउनुभयो । कोरोना महामारीको चौथो लहर सुरु भइसकेकोले होल्डिङ सेन्टर सञ्चालनको लागि केन्द्र तथा प्रदेशले स्थानीय तहलाई स्रोत साधन उपलब्ध गराउनुपर्ने कृष्णनगर नगरपालिकाका प्रमुख रजत प्रताप शाहले बताउनुभयो ।

कृष्णनगर नगरपालिकाले एक छाप्रो निर्माण गरी भारत वाट नेपाल आउनेहरूको स्वास्थ्य जाँच गरिरहेको छ । कोरोनाको पोजेटिभ रिपोर्ट आउनेहरूलाई पनि सिधै घर पठाउन स्वास्थ्यकर्मीहरू बाध्य भएका छन् ।