दीपक खत्री, सिन्धुपाल्चोक, २२ असार । नेपाल खुला दिसामुक्त घोषणा भएको ३ वर्षभन्दा बढी भइसकेको छ । व्यक्तिहरूले आफ्नो घरमा शौचालय बनाएको भएपनि बजार तथा मानिसको भीडभाड हुने स्थानमा सरकारले सार्वजनिक शौचालयको व्यवस्था नगरिदिदा खुल्ला दिसामुक्त क्षेत्र घोषणामा मात्रै सीमित भएको छ ।

सिन्धुपाल्चोकको सदरमुकामसमेत रहेको मुख्य बजार चौतारामा एउटा पनि सार्वजनिक शौचालय छैन । जिल्लाभरिबाट प्रशासनिक कामका लागि मानिसहरू चौतारा पुग्छन् । बजार क्षेत्रमा सधैंभीडभाड भइरहन्छ । बजारमा अन्य सुविधाहरू बढ्दै गएको छ, तर सार्वजनिक शौचालयको अभाव छ । जसका कारण प्रशासन, मालपोत जस्ता कार्यालयमा काम लिएर पुगेकाहरूले शौच गर्नको लागि खाजा खाने बाहनामा होटल तथा रेष्टुरेन्ट छिर्नुपर्छ ।

पैसा नहुनेहरू भने शौचालयकै खोजीमा भौँतारिने गरेका छन् । बजारमा शौच लागेपछि धेरै मानिसहरूले शान्त ठाउँ खोजेर विसर्जन गर्ने गरेको देखिन्छ । चौतारा बसपार्क अगाडी एउटा शौचालय रहेपनि हाल सो शौचालय प्रयोग गर्न सकिने अवस्थाको छैन । शौचालयको भौतिक संरचना भत्किएको छ भने पानी र सरसफाइको व्यवस्था नहुँदा यो प्रयोगमा छैन । जसका कारण यात्रु तथा सेवाग्राही मर्कामा पर्ने गरेका छन् ।

नगर क्षेत्रभित्र सार्वजनिक शौचालय र स्वच्छ पानीको व्यवस्था गर्न नगरपालिकालाई स्थानीयले पटक पटक ध्यानाकर्षण गराउने गरेका छन् । सार्वजनिक शौचालय नहुदा समस्या उत्पन्न भएकोले मुख्य बजारमा व्यवस्थित शौचालय बनाउन प्राथमिकता दिने चौतारा साँगाचोकगढी नगरपालिकाका उप प्रमुख सीता थापाको भनाइ छ ।

मानव जीवनशैली र सरसफाइका लागि शौचालय आधारभूत आवश्यकता भएपनि बजार क्षेत्रमा सार्वजनिक शौचालयहरू नहुँदा खुल्ला दिसामुक्त घोषण भएको नेपालको अवस्थामा घोषणामा मात्रै सिमित बनेको छ ।