काठमाण्डौ, १३ असार । सामाजिक सञ्जाल र सञ्चारमाध्यममा आफ्नो पहुँच बढाउनका लागि आवश्यक सबै कदम चाल्ने महिला सांसदहरूले प्रतिबद्धता जनाएका छन् ।  सामुदायिक सूचना नेटवर्क (सीआईएन) ले ‘सञ्चारमाध्यम र सामाजिक सञ्जालमा महिला सांसदको पहुँच र चुनौती’ विषयक अन्तरक्रियामा पूर्वमन्त्री तथा माओवादी केन्द्रका सांसद रेखा शर्माले सामाजिक सञ्जालमा सक्रियता बढाउने प्रतिबद्धता जनाउनुभयो ।  

पार्टीका निर्णय र गतिविधिका बारेमा सामाजिक सञ्जालबाट सार्वजनिक गर्नेभन्दा पनि त्यहाँ आइरहेका गुनासो, छलफलका बारेमा जानकारी लिन सामाजिक सञ्जालमा जोडिने गरेको उहाँको भनाइ छ । सांसदहरू केही आफ्नै कारणले सञ्चारमाध्यमको पहुँचमा नरहे पनि अधिकांश सञ्चारमाध्यमले महिला भएकै कारण प्राथमिकता नदिने सांसद शर्माको भनाइ छ ।  

प्रतिनिधि सभा मातहतको विकास तथा प्रविधि समितिका सभापति कल्याणी खड्काले एक व्यक्तिले मात्रै सूचना, जानकारी दिनसक्छ भन्ने मान्यता सञ्चारकर्मीमा देखिएको धारणा राख्नुभयो ।  पुरुषहरूले जस्तो उच्च मनोबलले बोल्ने वातावरण महिला सांसदलाई नभए पनि निर्णायक छलफलमा सहभागी भएमा वा सूचना दिने पदमा रहँदा महिलाले पनि उदाहरणीय काम गर्न सक्ने उहाँको भनाइ छ ।  

राजनीतिक दलहरूमा क्षमता भएका महिलाभन्दा कमजोर पुरुषलाई स्थान दिने परिपाटीले पनि यस्तो समस्या देखिएको उहाँले बताउनुभयो । नेपाली काँग्रेसका सांसद लक्ष्मी परियारले नेतृत्व भनेकै पुरुष हो भन्ने मानसिकता सञ्चारमाध्यममा रहेको टिप्पणी गर्नुभयो ।  महिला सांसदलाई नितृत्व र सञ्चारमाध्यमको पहुँचमा पु¥याउन पछाडि पारिएकाहरूको बारेमा सामग्री वा शृङ्खला तयार पार्नुपर्ने उहाँको सुझाव छ ।

पुरुष र महिला सांसदले एकै विषय उठाउँदा सञ्चारमाध्यममा पुरुष मात्र छाउने प्रवृत्ति कायम रहेको उल्लेख गर्दै सांसद परियारले आगामी दिनमा सञ्चारमाध्यम र सामाजिक सञ्जालमा पनि सक्रिय रहनका लागि कोसिस गर्ने प्रतिबद्धता जनाउनुभयो । एमाले सांसद सरिता न्यौपानेलेकेही सांसदलाई मिडियाले नै सेलिब्रेटी बनाउने गरेको विचार राख्नुभयो ।

कार्यक्रममा आर्थिक पत्रकार सङ्घका अध्यक्ष पत्रकार मोदनाथ ढकालले सञ्चारमाध्यममा बोल्नेमा महिला कम, लेख्नेमा पनि महिला कम र समाचारका विषयमा पनि महिला कम रहेको बताउँदै मिडियाले स्रोत एकदम छिटो खोज्ने र विश्वसनियता खोज्ने भएका कारण महिला सांसद पर्याप्त सङ्ख्यामा पहुँचमा नरहेको धारणा राख्नुभयो ।