निशु जोशी, नेपालगञ्ज, २१ जेठ ।  नेपालगन्ज उप–महानगरपालिकाको एउटा गाँउ, जहाँ मानिस मरेपछि अन्तिम संस्कार गर्ने ठाउँ पनि उपलब्ध छैन । मानिसको मृत्यु भएपछि शवलाई सडकमै गाड्नुपर्ने बाध्यता रहेको छ ।

नेपालगञ्ज बजारबाट ७ किलोमिटर पूर्व–दक्षिण दिशामा रहेको किङ्गरियनपुर्वा गाँउमा अन्तिम सस्कार गर्ने स्थल नहुँदा स्थानीयले शवलाई सडकमै गाड्ने गरेका छन् । नेपालगञ्ज २२ किङ्गरियनपुर्वाका जग्गुराम रैदासकि आमाको गत चैतमा मृत्यु भयो । अन्तिम संस्कार गर्ने अलग्गै स्थल छैन, जसका कारण उहाँले आमाको शव भर्खर ग्राभेल गर्दै गरेको सडकमै गाड्नुभयो ।

निर्वाचनको समयमा यो गाउँको लागि एउटा अन्तिम संस्कार गर्ने थलो निर्माण गरिदिने आश्वासन आउने गरेको छ । तर, त्यो स्थान अहिलेसम्म बनेन । आशाराम रैदासले पनि हजुरवाको आमादेखि, जन्मदिने आमा, बुबा, छोरा, भाइ, बु्हारी लगायतको शव सडकमा नै गाड्नुभएको छ ।

यो वडामा रैदास, किङ्गरियनजस्ता लोपोन्मुख समुदायको बसोबास रहेको छ । उनीहरूमध्य धेरै हिन्दु धर्मावलम्बी छन्, केही मुस्लिम समुदायका पनि रहेका छन् । तर, उनीहरूसँग आआफ्ना रिवाज अनुसार शवको अन्तिम संस्कार गर्नको लागि ठाउँ समेत छैन । यहाँका अधिकांश नागरिक इट्टा भटमा काम गर्छन् । केही बेरोजगार छन् । कमाइ नभएकाले गाडीमा हालेर टाढा रहेको घाटसम्म लैजान र दाउरा किन्न उनीहरूलाई सम्भव छैन । जसका कारण बस्तीमा कसैको मृत्यु भएपछि शव सडकमा नै गाड्नुको विकल्प हुँदैन ।

यो विषय उनीहरूले गत निर्वाचनको समयमा पनि उठाएका थिए । नागरिकले उठाएको मागलाई उपमहानगरपालिकाले सुरक्षित तरिकाले शव व्यवस्थापन गर्ने भएको छ ।उपमहानगरपालिकाका उपप्रमुख कमरुद्दिन राइनले उचित स्थानको खोजी गरेर ती समुदायका नागरिकको यो समस्यालाई समाधान गरिने र त्यसको लागि काम तत्कालै सुरु हुने बताउनुभयो ।

साविकको पूरैनी गाविसको रुपमा परिचित नगरसँंग जोडिएको किङ्गरियनपुर्वा गाउँले विगत ६ वर्षदेखि उपमहानगरपालिका भित्रको वडाका रुपमा कानूनी मान्यता पाएको छ । यो बस्तीका लगभग ३ सय परिवार मृत्युपछिको संस्कार गर्नको लागि उपयुक्त स्थलको व्यस्था हुने पखाईमा रहेका छन् ।