कुरिनटार, २७ चैत । चितवनको इच्छाकामना गाउँपालिकाका ८४ वर्षीया असक्तवृद्वा महिलालाई आफ्नै भान्जाले पटकपटक जबरजस्ती करणी गरेको घटना सार्वजनिक भएको छ। पिडित वृद्वाले आफ्नी छोरीलाई सो कुरा बताएपछि घटना सार्वजनिक भएको हो।

प्राप्त जानकारी अनुसार घटना केहि दिन अघिको हो। घटना बारे जानकारी हुनेबित्तिकै पिडित वृद्वाकी छोराले इलाका प्रहरी कार्यालय मुग्लिनमा पिडक विरुद्ध उजुरी दिएको छ। 

उजुरी पश्चात प्रहरीले पिडकलाई पक्राउ गरी हिरासतमा लिएको र घटनाबारे अनुसन्धान भैरहेको इलाका प्रहरी कार्यालय मुग्लिनले जानकारी दिएको छ भने घटनाबारे अनुसन्धान भैरहेकोले थप विवरण दिन नमिल्ने प्रहरीले बताएको छ। 

जबरजस्ती करणीकै कारण विक्षिप्त बनेकी वृद्वाको स्वास्थ्य परिक्षणको क्रममा भरतपुर अस्पतालमा चैत २० गते मृत्यु भएको छ। पिडितको मृत्यु पछि गरिएको शव परिक्षणमा समेत पिडितको यौनीमा क्षति पुगेको, सुन्निएको र चोट देखिएको, ३ वटा करङ भाच्चिएको लगायतको कुराहरु उल्लेख भएको स्रोतले जानकारी दिएको छ। 

यद्यपी पिडितको मृत्यु हुनुभन्दा पहिले नै पिडितसँग प्रहरीले बयान लिएको र उक्त बयानमा पिडितले आफ्नै भान्जाले आफुलाई मुख थुनेर पटकपटक जबरजस्ती करणी गर्ने गरेको प्रहरीलाई बताएको कुरा स्रोतले जानकारी दिएको छ। साथै सो कुराको भिडियो समेत रहेको स्रोतले बतायो। 

यस्तै इच्छाकामना न्युजलाई स्रोतले दिएको जानकारी अनुसार घटना गुपचुप पार्नको लागि प्रयास भैरहेकोले सो बारेमा यतिका दिनसम्म पनि घटना सार्वजनिक हुन नसकिरहेको बताए। घटना सामसुम पार्नको लागि केहि स्थानीय नेता र जनप्रतिनिधिहरु समेत लागिपरिरहेको र पिडित परिवारलाई लाखौ रुपैयाँको आर्थिक लोभ देखाउने काम भैरहेको बताए।

नोटः उल्लेखित घटनाको आरोपित र पिडित नातेदार रहेको कारण पिडितको पहिचान खुल्न सक्ने भएकोले नाम उल्लेख नगरिएको हो। यसैले सो सम्बन्धि प्रमाण र कागजात इच्छाकामना न्युजसँग सुरक्षित रहेको जानकारी गरिन्छ ।