३ किलोमिटर सडक बनाउन ४ वर्ष लाग्यो, तर सडक निर्माणको काम पूरा भएन

इच्छाकामना न्युज

२४, चैत्र २०७८

३ किलोमिटर सडक बनाउन ४ वर्ष लाग्यो, तर सडक निर्माणको काम पूरा भएन

राकेश शर्मा, म्याग्दी, २४ चैत । म्याग्दीको बेनी नगरपालिका–१ मा ३ किलोमिटर सडक ४ वर्षको अवधिमा पनि पूरा हुन सकेको छैन, ठाउँठाउँमा गरिएको कालोपत्रे पनि उप्किएको छ । ३ किलोमिटर सडकलाइ व्यवस्थित बनाउन वर्षौसम्म करोडौं रकम खर्च भइरहेको छ ।

बाग्लुङ–बेनी सडक अन्र्तगत बेनी नगरपालिका १ रत्नेचौरको भुवाने देखि हुलाकेडाडा खबरासम्मको सडक विस्तार र कालोपत्रे गर्न सडक डिभिजन कार्यालय बागलुङले २०७४ साउनमा नागार्जुन देब एण्ड सायर बिएन जेभीसँग १३ करोड १५ लाखमा ठेक्का सम्झौता गरेको थियो । सम्झौता अनुसार सडक निर्माणको काम २०७६ मा सक्ने लक्ष्य थियो ।

९० प्रतिशत भौतिक प्रगति भएको सडक निर्माणको काम दुई वर्षदेखि रोकिएको छ । जसले गर्दा यात्रा जोखिमपूर्ण रहेको यातायात व्यावसायी र यात्रहरू बताउँछन् । वि.सं. २०७६ माघमा सातदेखि दश मिटर फराकिलो बनाएर विस्तार भएको सडकमा पहिलो चरणको डिबिएसडी प्रबिधीको कालोपत्रे बिछ्याइएको थियो ।

कोरोना महामारी फैलिएपछि सोही सालको चैतमा गर्ने भनिएको दोस्रो चरणको कालोपत्रे हुन सकेन् । जसले गर्दा काम पूरा नहँदै सडक जिर्ण बनेको छ । अधुरो कामलाई पूर्णता दिन ताकेता गरेपनि निर्माण व्यवसायीले अटेरी गरेको पूर्वाधार विकास कार्यालयले जनाएको छ ।

निर्माण कम्पनीका प्रतिनिधि भने पहिरोले क्षति पुगेपछि थप गर्नुपर्ने कामको कारण ढिलाइ भएको बताउँछन् । २ वर्षमा सकिने काम ४ वर्षमा पनि नसकिदा यात्रुलाई दैनिक यात्रामा असहज मात्रै भएको छैन, राज्यको रकम पनि दोब्बरले खर्च भइरहेको छ ।