दाङको स्यानी गाउँमा सुर्यमुखी फूलको खेती फस्टाउँदै

इच्छाकामना न्युज

१३, चैत्र २०७८

दाङको स्यानी गाउँमा सुर्यमुखी फूलको खेती फस्टाउँदै

चन्द्र प्रकाश नेपाली, दाङ, १३ चैत । दाङको घोराही उपमहानगरपालिका वडा नम्बर ८ को स्यानी गाउँमा सुर्यमुखी फूलको खेती फस्टाएको छ । फूल खेतीकै कारण स्यानी गाउँ चर्चामा आएको छ भने आन्तरिक पर्यटक पनि बढिरहेका छन् । दाङमा यसअघि सुर्यमुखी फूलको व्यावसायिक खेती भएको थिएन ।

स्यानी गाउँका ५४ वर्षका यमबहादुर चौधरी र उहाँका श्रीमती शोभा चौधरीले गरेको सुर्यमुखी फूलको खेतीले गाउँ चिनाउने आधार बन्न थालेको हो ।

घोराही १० नारायनपुरबाट दक्षिणतर्फ लागेपछि पुगिने वडा नम्बर ८ को स्यानी गाउँ सुर्यमुखी फूलका कारण टाढैबाट चिनिने गरेको छ । एकनासले फूलेका फूलको सौन्दर्य हेर्न, फोटो खिच्न र टिकटक बनाउन पुग्नेहरूका लागि एक जनालाई ५० रूपैया शूल्क पनि तोकिएको छ ।

फूलखेती हेर्न दैनिक झण्डै ५ सय मानिसहरू पुग्ने गरेका छन् । जसबाट फूलखेती गर्दै आउनुभएका चौधरी दम्पतीले दैनिक १६ हजार सम्म कमाउन थाल्नुभएको छ । फूलखेतीमा मानिसहरूको आकर्षण बढेपछि यसलाई थप व्यवस्थित बनाउने सोँच उनीहरूले बनाएका छन् ।

७ महिना अघि ७ हजार रुपैँयाँ लगानी गरि ७ कठ्ठामा लगाईएको यो फूलबाट लगभग साँढे ३ क्वीन्टल दाना उत्पादन हुने अपेक्षा गरिएको छ । यसरी तेलको लागि गरिएको फूल खेतीबाट गाउँ नै चिनिने मौका आउँदा यमबहादुर चौधरी र शोभा चौधरी खुसी हुनुभएको छ ।