चितवनको गुरुङ समुदायले में त्हले (धनुष विद्या पर्व) दिवस मनाए

इच्छाकामना न्युज

३, चैत्र २०७८

चितवन, ३ चैत । चितवनको गुरुङ समुदायले में त्हले (धनुष विद्या पर्व) दिवस मनाएका छन्। हरेक वर्षको फागु पूर्णीमाको दिन गुरुङ समुदायले भव्य रुपमा मनाउने में त्हले (धनुष विद्या पर्व) दिवस यस वर्ष पनि एक कार्यक्रमको आयोजना गरि चितवनको गुरुङ समुदायले यो पर्व मनाएको हो।

विशेष गरेर गुरुङ समुदायको मौलिक धर्म संस्कार संस्कृति संरक्षणमा लागि परिरहेको संस्था तमू प्ये ल्हु संघ चितवनको नेतृत्वमा चितवनका गुरुङ समूदायले भरतपुर ११ नौरङ्गेमा रहेको खेमा क्होइवो स्थलमा जम्मा भै पर्व मनाएको हो।

यो पर्वमा गुरुङ समुदायले परापूर्व कालमा शिकारका लागि प्रयोग गर्ने धनुषवाण खेल खेलेर मनाउने गरेको छ। यस वर्ष पनि चितवनमा में त्हले (धनुष विद्या पर्व) दिवसमा प्रतियोगिताको आयोजना गरेको थियो। उक्त प्रतियोगितामा संघका निवर्तमान अध्यक्ष जगत बहादुर गुरुङ प्रथम, पूर्व सदस्य दान बहादुर गुरुङ दोस्रो र संघका उपाध्यक्ष मिन बहादुर गुरुङ तेस्रो भएका थिए।

संघका जिल्ला अध्यक्ष लालप्रसाद गुरुङको सभापतित्वमा सम्पन्न कार्यक्रममा संघको सल्लाहकार एवं अन्तर जिल्ला क्षेत्रिय मूल समितिका अध्यक्ष लेख बहादुर गुरुङ प्रमुख अतिथि रहेका थिए।

यस्तै कार्यक्रममा महिला समिति अध्यक्ष इन्द्रा गुरुङ, युवा अध्यक्ष आशिष गुरुङ लगायत संघका वर्तमान तथा निवर्तमान पदाधिकारीहरु, सदस्यहरु लगायतको सहभागिता रहेको थियो।